Мордовия Республикань Прявтось Владимир Волков сентябрянь 21-це чистэ вастовкшнось Ростехнадзоронь Волжско-Окской управлениянь прявтонть Константин Давыдов марто.
Константин Давыдов макссь покш питне ведомстванть ды Мордовия Республиканть вейсэнь важодемань лезэвчинтень. Кортамось мольсь 2018 иень футболонь коряс масторлангонь чемпионатонь объекттнэнь аноктсамодост, конатнень мельга ванны Ростехнадзорось – «Мордовия Арена» стадиононть строямодонзо ды Саранскойсэ аэропортонь комплексэнть одкстомтомадонзо. Кевкстематнень ванкшномадост мейле кемекстазь решеният, конат токить мундиалентень ёвтазь объекттнэнь анокстамонь вадрячинть ды максомань шканть топавтоманть.
Констанитн Давыдов истя жо ёвтнесь Владимир Волковнень сень коряс, Саранскоень куншкакуронь вейке ульцясонть прядовома лангсо Ростехнадзоронь зданиянть витнемась: «Футболонь коряс масторлангонь чемпионатонтень минек зданиясь ули анок!»
Теде башка, вастовомасонть кортавсть республиканть ды жилищно-коммунальной инфраструктурань объекттнэнь сёксень-телень шкантень анокстамодост, эрицятненень лембенть пачтямодонть, истя жо коммунальной услугатнень пачтицятнень икеле долгтнень пандомадост. Кавтонест ёнкстнэ ёвтасть анокчи виевстэ ды республикань эрицятнень лезэс вейсэнь важодемадонть.
Региононь Прявтонтень истя жо ёвтазь Мордовия Республикасо Ростехнадзоронь Волжско-Окского управлениянь прявтонь полавтыцясь Владимир Расшивалин, сон аравтозь те таркантень те иень майстэ Экологиянь, технологиянь ды атомной надзоронь коряс Федеральной службань прявтонть приказонзо вельде.
Мордовия Республикань Прявтонть пресс-службась