Владимир Волков вастовкшнось Весероссиянь амарицятнень вейсэндявксонь президентэнть Валерий Рухледев марто

Владимир Волков вастовкшнось Весероссиянь амарицятнень вейсэндявксонь президентэнть Валерий Рухледев марто

Мордовия Республикань Прявтонь тевтнень нурька шкас топавтыцясь Владимир Волков маень 17-це чистэ вастовкшнось «Всероссийское общество глухих» Весероссиянь инвалидэнь общественной организациянь президентэнть, инвалидтнэнь тевест коряс Россиянь Президентэнть пингстэ Советэнь членэнть Валерий Рухледев марто.

Кортавсть вейсэндявксонть региононь отделениянтень лезксэнь явомань кевкстематне. Владимир Волков алтась лездамс Саранскойсэ Весероссиянь амарицятнень вейсэндявксонь зданиянть витнемасонть. Истя жо ванновсть беряньстэ мариця ломантнень туртов республикасонть телефононь-диспетчерэнь службань теемань кевкстематне.

Валерий Рухледев ёвтась сюкпрянь валт Мордовиянь Прявтонь тевтнень топавтыцянтень вейсэндявксонть региононь отделениянтень весемеёндонь лезксэнь явоманть кисэ ды ёвтась кемема весероссиянь ды раськеютконь мероприятиятнень ютавтомсто республиканть марто вейсэнь важодеманть виевгавтомасонть. Весероссиянь амарицятнень вейсэндявксонь президентэсь тешкстызе региононть спортонь виев инфраструктуранть ды пачтясь, анок ёвтамс Саранскоенть 2029 иестэ Сурдлимпийской кизэнь налксематнень ютавтома таркакс.

Владимир Волков ёвтась кемема, Мордовиясь анок пек вадрясто ютавтомс неть пелькстамотнень. «2014 иестэ Саранскойсэ уш ютавтовсь а мариця спортсменттнэнь ютксо уйнемань коряс Европань чемпионатось. Ней минь ёроковсто анокстатано 2018 иень футболонь коряс мирэнь чемпионатонтень, ванкшнотано инжетнень кельгстемань, аэропортонь витнемань кевкстематнень. Футболонь чемпионатонть мельга кадовиця сюпавчинть тевс нолдамсто, миненек мереви ютавтомс спортонь ды культурань эрьва кодамо мероприятият», – тешкстызе Владимир Волков.

Неть кевкстематнень ванкшномасо примасть участия Мордовиянь Правительствань Председателень полавтыцясь Галина Лотванова, Мордовия Республикань Прявтонь администрациянь руководителенть полавтыцясь – Внутренней политикань коряс управлениянь прявтось Валерий Маресьев, «Всероссийское общество глухих» Весероссиянь инвалидэнь общественной организациянь Мордовиянь региононь отделениянь председателесь Ольга Зубаровская.

Мордовия Республикань Прявтонть пресс-службась