Мордовия Республикань Прявтонь тевтнень нурька шкас топавтыцясь Владимир Волков вастовкшнось Зубова-Полянань райононь прявтонть Сергей Сурдин марто. Кортавсть те ёнксонть социально-экономической виевгавтомань кевкстематне.
Ютазь иень сентябрясто Владимир Волков Зубова Полянасо улемстэ получась те ёнксонь эрицятнень пельде пек ламо пшкадемат. Сынь домкасто ванкшнозельть ды совавтозь маласо иетнес виевгавтомань программатнес.
Прявт кевкстематнестэ вейкесь – китнень строямось. Республикань руководителенть кармавтоманзо коряс, ярмактне, конат 2017 иестэ явовить те районсонть ки лангонь важодематнень топавтомс, улить покшолгавтозь. 36 млн целковойть максовить райононь центрантень – те сисемксть седе ламо 2016 иенть коряс. Ушодозь Зубова Поляна – Ширингуши кинть капитальной витнемась. Неень шкане витнезь те трассань кавто километрань участкась, эштё вете километрат арсеви одкстомтомс иенть прядовомс. Весемезэ 2017 иестэ Зубова-Полянань районсо китнень строямс явовить малав 80 млн целковойть – те 2,4-ксть седе ламо 2016 иенть коряс.
Республикань лидерэсь Владимир Волков тешкстызе, районсонть китнень одкстомтомась поладови 2018 иестэнтькак.
Вастовомань эштё вейке темакс кармась агропромышленной комплексэнть виевгавтомась. Кортавсть паксянь тевтне ды велень хозяйствань производстванть покшолгавтомась.
Истя жо мольсь кортамо Ясная Поляна велесэнть кемгавксово иеде седе вишкинетнень туртов реабилитациянь куншкакуронть строямонть прядомась – объектэнть арсеви макосмс 2017 иенть прядовомс.
Мордовия Республикань Прявтонть пресс-службась