Июнень 16-це чистэ Лямбирень ёнкссо ютась «Паксянь чи – 2017» республикань агропромышленной эрьва иень выставкась. Сонзэ участникекс кармасть масторонь 30 региононь малав 80 производительть. Выставкасонть невтевсть велень хозяйствань техникась, видьметне, минеральной удобрениятне, племань ракшатне, аграрной наукань од панжовкстнэ-муевкстнэ – весемесь, мезесь эряви агропромышленной комплексэнь виевгавтоманть туртов.
Выставканть торжественной панжомасонть ульнесть МР-нь Прявтонь тевтнень нурька шкас топавтыцясь В.Д.Волков, МР-нь Правительствань Председателень васенце полавтыцясь – Велень хозяйствань ды продовольствиянь министрась В.Н.Сидоров, Россиянь сахаронь нолдыцянь союзонь правлениянь председателесь А.Б.Бодин, Лямбирень райононь администрациянь прявтось Ш.Ф.Давыдов.
Владимир Волков, мероприятиянь участниктненень ды инжетненень пшкадемсэ тешкстызе, республикань агоропрмышленной комплексэсь эрязасто виевгады: «Те иень 5 ковтнень перть велень хозяйствань производствань касомась кармась 104,5 процентт. Мордовиясь свал саи васенце таркат Равчирень федеральной округонь ды Россиянь Федерациянь регионтнэнь ютксо вейке ломаненть лангс нолдазь велень хозяйствань продукциянть коряс. Минь нолдатано эсенек туртов весе ярсамопеленть, тень пингстэ нолдазь продукциянть эйстэ 60 проценттнэнь пачтятано минек региононть томбалев. Вете иетнень перть республикасонть сывелень нолдамось кассь 2,5-ксть. Касы ловсонь нолдамось – 2017 иестэ путозь задача вейке скалонть пельде потявтомс 6 тёжат ловсо, ды те топавтови. Кеман, «Республикань Паксянь чись – 2017» карми агропромышленной комплекссэ од изнявкстнэнь кортамонь, вейсэнь важодемань сюлмотнень кемекстамонь ды профессиянь содамочитнень максомань лезэв площадкакс.
Владимир Волков ёвтась аграрийтненень сюкпрянь валт сынст важодемаст кисэ ды явшесь казнеть. Истя жо казевсть «Лучшее свеклосеющее хозяйство России 2016 года» конкурссо изницятне – дипломсо тешкставсть республикань сисем предприятият.
Владимир Волков ваннынзе выставкасонть невтезь весе экспозициятнень, истя жо макссь питне велень хозяйствань техникань важодемантень. Башка мель явозель неень шкань технологиятненень. Региононь руководителесь тешкстызе: АПК-со покш изнявкстнэнь саемга, отраслянтень эряви совавтомс од панжовкстнэнь-муевкстнэнь. Ютазь иестэ республикань Минсельхозсо теезь геоналитической куншкакуро, косо моли велень хозяйствань модатнень оперативной мониторингесь. Куншкакуронь важодицятне цифровой космической съемканть вельде саезь даннойтнень коряс куроксто максыть питне. Те кулянть ванкшномась лезды примамс управлениянь вадря решеният. Видьметнень, паксянь границятнень мереви ванномс оптической ды радарной снимкатнесэ, конатнень эрьва чистэ максы Космической исследованиянь институтось. Неть снимкатнень вельде мереви, невтемакс, ванномс видезетнень лисеманть, моданть температуранть ды начкочинть.
Квадракоптерэнть вельде аэросъемкась – 300 метрань сэрьсэ – нолды тевс республикань агрохимической куншкакурось, сон ютавты велень хозяйствань модатнень мониторингенть ды анализэнть. Те весемесь тееви аграрийтнень тевест шождалгавтомга ды сокамонть-видеманть лезэвчинзэ кастомга.
Выставкасонть Владимир Волков ваннынзе весе муниципальной районтнэнь павильонтнэнь, конат невтизь территориятнень социально-экономичнеской виевгавтоманть. Эрьвантень эйстэст ульнесь мейсэ дивавтомс инжетнень – народной промыслатнесэ, раськень ярсамопельтнесэ. Башка мель марто Мордовиянь лидерэсь ванкшнынзе фермерэнь предприятиятнень продукцияст.
Выставканть ванкшномадонзо мейле Владимир Волков макссь зярыя кармавтомат МР-нь Правительствань Председателень васенце полавтыцянтень – Велень хозяйствань ды продовольствиянь министрантень В.Н.Сидоровнень, сынь токшить аграрийтненень седе тов лездамонть ды республикань велень хозяйствань предприятиятнесэ икелев молиця технологиятнень тевс нолдамонть.
Обедтэ мейле Владимир Волков Республикань Кудосо ютавтсь промкс райононь прявттнэнь марто агропромышленной комплексэнь виевгавтоманть коряс. Кортавсть велень хозяйствасо неень шкане молиця тевтне, истя жо тикшенть ледемась ды сюронь пурнамонтень анокстамось.
Мордовия Республикань Прявтонть пресс-службась