Таштамковонь 11-це чистэ Республикань Кудосо казевсть здравоохранениянь, санитарно-эпидемической сэтьмечинь службань важодицятне, специалисттнэ ды волонтертнэ, кить бороцясть коронавирусонь инфекциянть каршо. Пурнавозетненень поздоровонь лембе валт ёвтась Мордовиянь Прявтось Владимир Волков.
Пурнавозетненень пшкадемстэ, региононь руководителесь тешкстызе, уш малав пель ие Мордовиясь эри покш анокчинь лувсонть. «Неень шкань эпидситуациясь а мери медицинань ды санитарной контролень органонь важодицятненень лавшомгадомс ды лекстямс. Коронавирусонь инфекциянть лангсо изнямодонть кортамс рана. Зярс арась вакцина, вирусось кадови мартонок. Текень марто, тевтнень стакалгавты гриппень ды ОРВИ-нь коряс од эпидсезонось. Ансяк редяви, вейсэнь бажамотнень ды, нама, тынк героической важодеманть вельде минь кармавтынек эпидемиянть аламодо потамс».
Апак вано весе стакачитнень лангс, республикань здравоохранениянь системась цидярдынзе варчамотнень. Больницятнесэ теезельть малав 2 тёжат таркат, те 5-ксть седе ламо икелень арсематнень коряс.
Мордовиянь эрьва колмоце больницясь теезель «ковидэнь» госпиталекс. Те республикань пелест ёнкстнэсэ лецямонь 18 учрежденият. Пек ламо тевть савсь топавтомс врачтненень-реаниматологтненень ды Медицинань лезксэнь куроксто явомань станциянь бригадатненень. Чинь-вень перть важодсть специалисттнэ, конат ютавтсть КТ-нь ванкшномат, башка тешкстазель республикань ветеце больницянь поликлиникась.
Пандемиянть шкасто «коронавируссо» сэредицятненень теезь кементь операцият. Владимир Волков тешкстынзе Республикань клинической больницянь, Катковонь лемсэ больницянь ды Республикань эйкакшонь больницянь врачтнень-хирургтнень пек вадря важодемаст, покш ответсвенность путозельть Рузаевкань райононь больницянь важодицятнень лангс, сынсь чачтавсть коронавируссо сэредиця аватнень.
«Ёвтан сюкпря эрьвантень эйстэнк пек вадря важодеманть кисэ! Пандемиянть шкасто «ковидэнь» госпитальтнесэ важодсть 118 студентт ды ординаторт. Сюкпря апелемачинть ды сы шкань профессиянтень кемевиксчинть кисэ», – мерсь Мордовиянь Прявтось.
Тешкстазель, покш тевть савсь топавтомс Роспотребнадзоронь важодицятненень. Теезь ПЦР-тестированиянь туртов база, анокстазь пандемиянть шкасто важодемань туртов вешемат экономикань эрьва сферанть, эрьва предприятиянть туртов. Ней коронавирусонь лангс тестт теезь Мордовиянь эрицятнень ветеце пельксэнтень, те малав 185 тёжат исследованият. Минек санитарно-эпидемической службанть лезэв важодеманть тешкстызе Россиянь Президентэсь В.В.Путин.
Республикань Гигиенань ды эпидемиологиянь 7 важодицятне тешкстазь государственной од казнесэ – Пироговонь орденсэ.
Владимир Волков тешкстызе, минек медучреждениятне тейсть лекарствань, оборудованиянь ды ванстомань средствань вадря анокставкс. Тенень лездасть «Фармациянь» специалисттнэ. Саранскойсэ, «Биохимик» заводсонть медучреждениятнень ды Мордовиянь университетэнть лезксэст вельде анокстазь ды нолдазь коронавирусонь лецямонь од препарат. Россиянь Минздравось совавтызе «Арепливирэнть» коронавирусонь лецямонть туртов официальной спискантень. «Азитромицин» антибиотикенть марто, конась истя жо нолдави «Биохимиксэ».
Региононь руководителесь макссь покш питне медицинань вейсэндявксонть ды властень органтнэнь вейсэнь важодемантень. «Минздравонтень савсь топавтомс аволь шожда тевть, конат сюлмавозь лецямонь учреждениятнень анокстамост, оборудованиянть, лекарстватнень, ванстомань средстватнень рамамост, медработниктненень стимулирующей ярмактнень пандомаст, кадратнень анокстамост, врачонь специализированной бригадатнень пурнамост марто. Весе кевкстематне витевсть куроксто.
Тень истя жо тешкстызь пульмонологиянь коряс Россиянь содавикс специалисттнэ, конат сакшность республикав консультациянь максомо. Московонь специалисттнэ мерсть, минек врачтнэнь ды медучреждениятнень важодемаст лади неень шкань вешематненень.
Владимир Волков ёвтась ризксэнь валт весенень, кить ёмавтызь малавиксэст, мартост важодицятнень ды ялгаст. «Сынь алкуксонь геройть, меельцекс топавтсть эсь долгост. Минек тевенек – ванстомс сынст лемест ды тевест, лездамс семияст туртов. Ды, нама, теемс весементь, медицинань сеть важодицятнень ванстомга, кить течи поладыть те бороцямонть. Меельце шкастонть ванстови медицинанть лангс покш нагрузкась. Икеле минек учить пек ламо тевть. Ансяк редяви, од «тюремантень» минь чалгатанок виевгадозь, покш содамочинь ды опытэнь таштазь».
Те чистэнть покш казнеть максозь здравоохранениянь, санитарно-эпидемической сэтьмечинь службань важодицятненень, специалисттнэнень ды волонтертнэнень, кить бороцясть коронавирусонь инфекциянть каршо.
Мордовия Республикань Прявтонть Указонзо коряс шумбрачинь ванстомань ёнкссо покш изнявкстнэнь ды коронавирусонь инфекциянть каршо (COVID-19) бороцямонтень редявикс путовкстнэнь кисэ Славань III степенень орденсэ казезь – Мордовия Республикань Здравоохранениянь министрась Олег Маркин ды Республикань инфекционной клинической больницянь прявт врачось Сергей Чванов. Сергей Евгеньевич здравоохранениясо весе важодицятнень пельде ёвтась сюкпря Республикань Прявтонтень пандемиянть изнямонь коряс важодеманть ладямсто лезксэнь явоманть кисэ. Республикань инфекционной клинической больницянь прявт врачось истя жо тешкстызе, апак вано сень лангс, што медучреждениянь коллективень колмоце пельксэсь – важодиця пенсионерт, вейкеськак эйстэст эзь сае больничной ды эзь туе самоизоляцияв. «Мартонок важодиця 65 иеде седе сыретне кадовсть важодема таркатнес ды нейгак бороцить коронавирусонь инфекциянть каршо». Сергей Чванов тешкстызе, федеральной ды республикань бюджетэнь ярмактнень лангс, конат явозельть пандемиянть крашо бороцямонь шкастонть, редявикстэ виевгавтозь Инфекционной больницянь материально-технической юрось: «Весе те нолдави тевс Мордовиянь эрицятненень медицинань эрявикс лезксэнть явомсто».
«Заслуженный врач Республики Мордовия» почетонь лемесь максозь Ольга Македонскаянень, Мордовия республикань верень саемань станциянь прявт врачонтень. «За личный вклад в развитие Республики Мордовия» Мордовия республикань Прявтонь почетонь тешкссэ казезь Ольга Портова – Республикань противотуберкулезной диспансерэнь эпидемиологиянь отделэнь прявтось – врачось-эпидемиологось.
Мордовия Республикань Почетонь Грамотасо казезь – Сергей Сяткин, С.В. Катковнь лемсэ Республикань клинической больницянь приемной отделениянь врачось ды Татьяна Федотова, Республикань инфекционной клинической больницянь реанимациянь ды интенсивной терапиянь отделениянь медицинской сестрась.
Коронавирусонь инфекциянть каршо (COVID-19) бороцямонтень покш путовксонть кисэ Мордовия Республикань Прявтонть Благодарность яволявтозь Н.П.Огарев лемсэ МГУ-нь студенттнэнень, конат важодсть «ковидэнь» госпитальтнесэ – Анастасия Балахонскаянень, Владислав Бибиковнень ды Елене Назарованень.
Истя жо Мордовия Республикань Прявтонть Благодарностьсэ тешкстазь Н.П.Огарев лемсэ МГУ-нь анестезиологиянь ды реаниматологиянь кафедрань ассистентэнть Павел Замышляевень важодемазо, сон – «Волонтеры-медики» Мордовиянь региононь отделениянь координатор, сыре ломантненень лездамонь коряс региононь волонтеронь штабонь прявт. Мордовия Республикань Прявтонть Благодарность яволявтозь Евгений Козловнень – Н.П.Огарев лемсэ МГУ-нь амбулаторно-поликлинической терапиянь кафедрань преподавателентень. Сон важодсь университетэнь карантинэнь общежитиясонть.
Кенярксчинь промксонть прядовомсто Мордовиянь Прявтось Владимир Волков ёвтась сюкпря весе пурнавозетненень. «Покш сюкпря тыненк ды мартонк важодицятненень эсь прянь апак вансто важодеманть ды тёжат идезь эрямотнень кисэ! Арсян тенк кеме шумбрачи, вадрянтень кемема, оймень виевчи, сэтьмечи ды паро эрямо!»
Мордовия Республикань Прявтонть пресс-службась