Июнень 12-це чистэ Республикань Кудосо ютавтовсь трудонь ды общественной тевдеемасо изнявкстнэнь кисэ каземань церемониясь, конась алтавсь Россиянь чинтень.
Мордовия Республикань Прявтонь тевтнень нурька шкас топавтыцясь Владимир Волков, вастовоманть ушодомтсо, ёвтась церемониянь участниктненень ды республикань весе эрицятненень поздоровт государственной кенярксчинть кувалма. «Те кенярксчись пештезь Тиринь масторонтень седейстэ молиця ёжомарямотнесэ. Минь аштетяно покш каштанчисэ Россиянть коряс! Минь а явовтано масторонь ламо пингень историядонть, койтнеде-кирдатнеде, культурадонть. Минь ютынек вейке ки, минек вейкине сы шканок», – мерсь Владимир Волков.
Мордовиянь лидерэсь тешкстызе, Россиянь Чистэнть казезекс улемась пек почетна ды канды домка смусть. «Течинь лауреаттнэ – эрьва кодамо поколениянь, важодемань эрьва кодамо ёнкссонь ломанть. Течи тей пурнавсть образованиянь ды наукань, культурань ды искусствань важодицят, спорстментт, государственной деятельть, общественной организациянь активистт, ламо эйкакшонь кастыця тетят-ават, ёроков од ломанть. Ёвтан тыненк весенень сюкпрянь валт эсь тевентень мелень явоманть, ёроков гражданской позициянть, стака, ды теке шкане пек эрявикс важодеманть кисэ. Кеман: зярс республиканть улить истят ломанензэ, кода тынь – минек кармить изнявксонок весе ушодкстнэсэ», – тешкстызе Владимир Волков.
Апак учонь тевтнеде эрицятнень ванстомаст кисэ «Заслуженный спасатель Республики Мордовия» почетонь лемесь максозь ПЛЮСКОВ Владимир Викторовичнень – «1 отряд федеральной противопожарной службы по Республике Мордовия» федеральной государственной казенной учреждениянь 2№ толонь мадстемань-идемань караулонь прявтонь лездыцянтень.
Государственной властень органтнэсэ ламо иень перть лезэв важодеманть кисэ «Заслуженный работник органов государственной власти Республики Мордовия» почетонь лемесь максозь КИСЕЛЕВА Светлана Евгеньевнанень – Мордовия Республикань Государственной Собраниянь Бюджетэнь, финансонь ды налогонь коряс Комитетэнь председателентень.
Культурасо изнявкстнэнь ды ламо иень перть лезэв важодеманть кисэ «Заслуженный работник культуры Республики Мордовия» почетонь лемесь максозь СИМКИНА Оксана Евгеньевнанень – Л.П.Кирюков лемсэ Саранскоень музыкальной училищань прявтонтень.
Культурасо ды духовно-нравственной воспитаниясо ламо иень перть вейсэнь лезэв важодеманть кисэ «Лауреат премии Главы Республики Мордовия» лемесь максозь БОРОДАЧЕВ Николай Михайловичнень – Россиянь Федерациянь кинофильматнень Государственной фондонь генеральной директоронтень.
Историянь сюпавчитнень ванстомань тевентень ды од ломантнень патриотизмань лувсо кастомантень покш путовксонть кисэ «Лауреат премии Главы Республики Мордовия» лемесь максозь НИКИШОВА Елена Васильевнанень – Ельникень историянь-краеведениянь музеень лекторонтень-экскурсоводонтень ды ШАШАНОВА Татьяна Анатольевнанень – Ельникень историянь-краеведениянь музеень прявтонтень.
Россиянь Федерациянь Президентэнть кармавтоманзо коряс Россиянь од учёнойтненень государствань лезксэнь явоманть коряс Россиянь Федерациянь Президентэнть грантонть получамс 2017 иень пелькстамосонть изницянь свидетельства максозь ЛАПИН Кирилл Сергеевичнень – М.Е.Евсевьев лемсэ Мордовиянь государственной педагогической институтонь информатикань ды вычислительной техникань кафедрань страшей преподавателентень.
Экологиянь ёнкссо изнявкстнэнь кисэ «Заслуженный эколог Республики Мордовия» почётонь лемесь максозь РУЧИН Александр Борисовичнень – П.Г.Смидович лемсэ Мордовиянь государственной пертьпельксэнь заповедникень прявтонтень.
Важодемасо изнявкстнэнь ды Саранск ошонть вадрялгавтомасо покш путовкстнэнь кисэ Мордовия Республикань Прявтонть Благодарность ёвтазь САВВАТЕЕВА Наталья Васильевнанень – «Домком-Сервис 1» ООО-нь дворникентень-ванськавтыцянтень.
Республикасо экологиянь вадрялгавтомантень покш путовксонть кисэ Мордовия Республикань Прявтонть Благодарность ёвтазь ТУЖИЛКИНА Наталья Петровнанень – Мордовия Республикасо Весероссиянь народной фронтонь региононь отделениянь активистэнтень, Лямбирень муниципальной райононь Атемар велень поселениянь депутатонтень.
Физической культурасо ды спортсо изнявкстнэнь ды шожда атлетикасо спортонь покш саевкстнэнь кисэ «Заслуженный работник физической культуры Республики Мордовия» почётонь лемесь максозь ШВЕЦОВ Евгений Валерьевичнень – сурдлимпийской ды паралимпийской резервань спортивно-адаптивной школань спортсменэнтень-инструкторонтень.
Ирансо 2017 иестэ Греко-римской бороцямонь коряс мирэнь Кубоксонть покш изнявкстнэнь ды раськеютконь аренасо Мордовия Республиканть славамонзо кисэ «Лауреат премии Главы Республики Мордовия» лемесь максозь СУРКОВ Артем Олеговичнэнь – А.В. Мишинэнь лемсэ бороцямонь коряс олимпийской резервань спортивной школань спортсменэнтень-инструкторонтень.
Таиландсо 2017 иестэ интеллектуальной колавкстнэнь марто сэредицятнень ютксо шожда атлетикань коряс мирэнь чемпионатсонть покш изнявкстнэнь ды раськеютконь аренасо Мордовия Республиканть славамонзо кисэ «Лауреат премии Главы Республики Мордовия» лемесь максозь ХОХЛОВА Алина Алексеевнанень – сурдлимпийской ды паралимпийской резервань спортивно-адаптивной школань спортсменкантень.
Таиландсо 2017 иестэ интеллектуальной колавкстнэнь марто сэредицятнень ютксо шожда атлетикань коряс мирэнь чемпионатсонть покш изнявкстнэнь ды раськеютконь аренасо Мордовия Республиканть славамонзо кисэ «Лауреат премии Главы Республики Мордовия» лемесь максозь ХОХЛОВА Регина Алексеевнанень – сурдлимпийской ды паралимпийской резервань спортивно-адаптивной школань спортсменкантень.
Кенярксчинть лувсо истя жо явшевсть паспортт республикань од эрицятненень – школасо тонавтницятненень, эрьва кодамо пелькстамонь ды олимпиадань изницятненень. Сыненст пшкадемстэ, Владимир Волков тешкстызе: «Илядо стувто, тынь чачиде ды эрятадо масторсо, конась казсь мирэнтень ламо содавикс ломанть: ученойть, военнойть, писательть, врачт, художникть, тонавтыцят, спортсментт, государственной ды общественной деятельть. Те минек солдаттнэ велявтсть изнямо марто Берлинстэ, олякстомтызь масторонть ды весе мирэнть ятонть эйстэ. Минек масторось васенцекс ливтясь космосов. Течи минь тешкстатано вечкевикс Саранскоенть чачома чинзэ. Тедеде топодить 200 иеть адмиралонть Федор Ушаковонь ине лементь ледстнемань шкастонть, 100 иеть Советской Союзонь Героенть, Мордовиянь Почетной гражданинэнть Михаил Петрович Девятаевень чачома чистэ. Неть событиятне ды лемтне пингеде-пингес кармить ледстневеме. Весе те – минек вейсэнь историясь, вейсэнь каштанчись. Тыненк, одтнэнень, эряви строямс од Россиянть, ванстомс ды паролгавтомс минек виев ды аволь зависимой государстванть. Тень ловозь каштанчисэ кандодо Россиянь гражданинэнь почетонь лементь!»
«Ученик года – 2017» образовательной организациянь тонавтницятнень Регионъютконь пелькстамосонть вадрясто прянь невтеманть кисэ Мордовия Республикань Прявтонть Благодарность ёвтазь ДАНИЛОВ Кирилл Игоревичнень – Саранск ошонь 20№ Гимназиянь 11-це классонть тонавтницянтень.
Семиянь питнейчитнень вельмевтемантень ды кемекстамонтень покш путовксонть кисэ Мордовия Республикань Прявтонть Благодарность ёвтазь Рузаевка ёнксонь Левжа велестэ КАНАЕВТНЕНЬ семиянтень. Сынь лиссть изницякс «Успешная семья Приволжья – 2017» юбилеень V фестивальсэнть-пелькстамосонть «Родительская слава» номинациясонть.
Официальной пельксэнть прядовомадонзо мейле Владимир Волков лембестэ кортась мероприятиянтень пурнавозетнень марто ды ёвтась тост государственной кенярксчинть кувалма – ине Россиянть, тиринь масторонть ды республиканть паро эрямонзо кисэ.
Мордовия Республикань Прявтонть пресс-службась