Владимир Волков ёвтась поздоровт IT сферасо важодицятненень профессиональной кенярксчинть кувалма

Владимир Волков ёвтась поздоровт IT сферасо важодицятненень профессиональной кенярксчинть кувалма

Полавтовить шкатне, профессиятне ды натой кенярксчитне. Россиясь иень 256-це чистэнть тешксты Программистэнь чинть. Сон савтовсь таштамковонь 12-це чинтень. «Мезекс истят стакачить?» – кевкстядо тынь. «256 числась кочказь секс, мекс те зняро эрьва кодат значеният, конатне невтевить восьмиразрядной байтонть вельде», – ёвтыть тенк it-ишниктне.

Мордовиясо IT-технологиятнень марто весе вадря. Тесэ чарькодить, те ёнксонть виевгавтомась тешксты неень шкань эрямонть, деловой ды социальной активностенть, важодемань рынкань перспективатнень.ю оштнень ды велетнень касоманть-кепетеманть. Течи вейкеяк отраслясь, вейкеяк предприятиясь ды вейкеяк ломанесь а эрявить цифровой решениятневтеме.

Кенярксчинть каршо Мордовиянь Прявтось Владимир Волков Республикань Кудонь колонной залсонть вастневсь программистнэнь марто, ёвтась тенст поздоровонь лембе валт профессиональной кенярксчинть кувалма, кунсолынзе кевкстемаст ды мелест-арсемаст.

«Програмистэнь чинть каршо минь васенцеде ютавтанок истямо покш вастовома республикань IT вейсэндявксонь предаставительтнень марто, – тешкстызе Мордовиянь Прявтось. – Секскак, васняяк, ёвтан тенк поздоровт профессиональной кенярксчинть кувалма. IT технологиятнень касомаст-виевгавтомаст эйстэ ашти неень шкань эрямось, деловой ды социальной ёрокчись, оштнень ды велетнень виевгавтомась. Тынк профессиясь неень шкань эрямосонть пек эрявикс».

Владимир Волков тешкстызе, IT отраслянтень покш мель явови Россиянь Президентэнть В.В.Путинэнь пельде. Топавтови «Цифровая экономика» нацпроектэсь.

«Республикасонть анкотсазь «цифровой трансформациянь» госпрограмма. Сонзэ вельде топавтовить зярыя тевть информационной инфраструктурань ды цифровой государственной управлениянть виевгавтомга, – мерсь В.Д. Волков. – Те иень аштемковсто Россиянь Президентэсь яволявтсь IT отраслянть туртов лездамонь од ёнкстнэде. Истя, IT компаниятнень туртов валгтозь страховой взносонь ставкатне (14% саезь 7,6 процентс), истя жо редявиксстэ валгтозь прибыленть лангс налогось 20% саезь 3 процентс».

Республикась полады кирдеме эсенек IT компаниятнень арсемаст-анокставксост. «Минь уш важодтянок зярыя компаниятнень марто МФЦ-нь автоматизациянь, эрицятнень социальной регистрань, муниципальной правовой акттнэнь, электронной документооборотонь системань ветямонь проекттнэнь коряс, – мерсь МР-нь Прявтось. – Тынь чарькодтядо, тесэ республикань финансонь возможностне киртязь, бути ваномс лия регионтнэнь лангс. Секскак миненек эряви, штобу совавтомс минек ресурстнэнь федеральной структуратнес ды регионтнэс. Зярыя минек компаниятне саить лия региононь рынкатнень, ды важодить экспортонть лангс».

Мордовиянь Прявтось кармавтсь Информатизациянь ды связень министрантень Игорь Вольфсоннэнь вейсэ Минэкономикнать, «Виевгавтомань корпорациянть» марто арсемс свалшкань площадканть теемадонзо, конась карми шаштомо республикань компаниятнень IT продуктатнень Россиянь ды омбо масторонь рынкатнес, явомс лезкс виевгавтомань федеральной институттнэнь пельде инвестициятнень тердемга.

«Минь аноктанок панжадо кортамотнень административной пирявкстнэнь каямга, конат а нолдыть IT компаниятнень виевгавтоманть, отраслянтень лоезксэнь явомадо, льготань арендадонть, тонатвомнаь вейсэнь программатнень топавтомадо, республикаоснть IT индустриянь мероприятиятнень ютавтомадо, – мерсь Владимир Волков. – Теде башка, республикась ванносы важодема таркань максыцятнень марто вейсэ питней специалисттнэнь туртов ипотекань кредитэнь софинансированиянть. Те лезды теемс условият республикасонть вадря кадратнень ванстомга ды лия ёнкстнэстэ сынст тердемга».

Мордовиянь Прявтось ёвтызе, IT сферасонть важодить 1100 ломанть, тевест топавтыть 150 ламо покш ды вишка организацият, конат невтить редявикс изнявкст.

Отраслясонть ванстови покш зарплата Индустриясонть важодить од ломанть, конат прядызь республикань вузтнэнь ды техникумтнень.

«Мордовиянь покш технологиянь отраслясь невти касомань вадря темпат. Эксперттнэнь ванномаст коряс, Мордовиянь IT компаняитне меельце 5 иетнестэ касыть седе эрязасто респрубликань средней экономикнать коряс. (15-20 процентс иезэнзэ). Мелят сынст оборотост кармась 1,5 млрд. целковойть, – тешкстызе В.Д. Волков. – Ламосо касомань неть темпатне саевить минек компаняитнень конкурентоспособностенть вельде.

Истя, невтемакс, «Эволента» компаниянь программатне нолдавить тевс масторонь 30 регионтнэсэ. Зярыя сынсь арсематне-важодевкстнэ совавтозь Отечественной программань обеспечениянь федеральной реестрантень. Те, васняяк, МФЦ-нть туртов комплексной решениятне, электронной лувс услугатнень ютавтомань коряс проекттнэ. Сеть ёнкстнэ, конат кармасть пек эрявиксэкс пандемяинть шкасто, зярдо ламот предприятиятне, тонавтнемань организациятне ютасть ве ёндонь важодемань лувонтень. Зярдо эрявсь куркосто топавтомс Президентэнть кармавтоманзо эрицятненень, семиятненень, бизнесэнь представительтненень ды экономикань цела отраслятненень финансонь лезксэнь явомадо».

Те чистэнть Владимир Волков явшесь программистнэнень государственной покш казнеть ды арсесь изнявкст важодемасонть.