Июнень 27-це чистэ Владимир Волков ульнесь «Юбилейный» Саранскоень од микрорайонсонть «17№ Эйдень кужо» Эйкакшонь развитиянь куншкакуронь панжомасонть. Истя жо сон ваннызе Ремзаводсо одкстомтозь 83№ эйдень кужонть. Республикань лидерэсь мерсь, дошкольной образованиянь учреждениятнень строямось ды виевгавтомась ашти Мордовиянь социальной политикань прявт тевекс.
Эйкакшонь развитиянь од куншкакуронть ванномсто В.Д.Волков мерсь, неень шкане республикасонть витезь стакачись 3-7 иесэ эйкакштнень туртов эйдень кужотнесэ таркатнень тееманть коряс, ней витеви 3 иеде седе вишкинетнень туртов таркань теемань кевкстемась. Сон истя жо тешкстызе, ней ламо вийть путовить лавшо шумбрачи марто эйкакштнень туртов вадря условиятнень тееманть коряс. «Модернизация дошкольного образования» федеральной программанть 5 иетнень перть топавтоманть вельде Мордовиясо витнезь, одкстомтозь ды строязь 52 эйдень кужот. Эряви тешкстамс, федеральной программанть топавтомась прядовсь, Мордовиясо ялатеке поладови эйдень кужотнень строямось ды витнемась, 3 иеде седе вишкинетнеяк якаст дошкольной учреждениятнес. Неень шкане тешкстазь 30 эйдень кужот, конатне кармить витнезь эли строявить одс. Маласо шкастонть панжови эйдень кужо 250 таркас Торбеевасо ды 240 – Орданьбуесэ. Саранскойсэ панжовить эйкакшонь развитиянь эштё кавто куншкакурот. Строяви эйдень кужо Левженский посёлкасонть. Весемезэ дошкольной учреждениятнесэ башка таркатнень теемс федеральной бюджетстэ явозь 866 миллионт целковойде ламо, республикань – 834 миллионт.
Теде мейле республикань руководителесь ульнесь Ремзавод посёлкань 83№ эйдень кужосонть, конась панжозь педе-пев витнемадонть мейле. Ней те неень шкань вешематненень ладиця ды од оборудования марто дошкольной образованиянь учреждения. Владимир Волков мерсь, республикань эйкакштненень эряви максомс весементь сехте вадрянть.