Мордовия Республикань Прявтонь тевтнень нурька шкас топавтыцясь Владимир Волков июлень 4-це чистэ ютавтсь 2018 иень Футболонь коряс масторлангонь чемпионатонтень анокстамонь коряс выездной зярыя промкст. Региононь руководителесь ванынзе мундиалень объекттнэсэ молиця тевтнень, башка мель явсь сетненень, конатнень одкстомтомась ды строямось токши ломантнень эрямост.
Истя, лембень-насосонь од станциянть строямонь объектсэнть Владимир Волков невтизе подрядчиктненень, те ёнксонть лембень сетнень одкстомтоманть коряс куватьс молиця тевтне, конатне истя жо ветявить од стадиононть лембень сетненень вейсэндявоманть марто, канды покш стакачить Химмашонь ды «Юбилейноень» эрицятненень, конатне пиштевтить пси ведень лоткавтоманть коряс.
«Ломантне монень гайневтить, пеняцить пель Химмашсо зяроце недля арась пси ведь, Севстопольской курось весе чувнозь! Ды те сень пингстэ, зярдо подрядчикентень кармавтозель вейсэндямс строямонть марто сюлмавозь пси ведень лоткавтоманть планонь графикенть марто ды тень вельде а кандомс ломантнень стакачить!»
Региононь руководителесь кармавтсь подрядчикентень эрязкавтомс важодеманть, анокстамс графикть, ламолгавтомс объектсэнть важодицятнень: «Тееде кавто сменат! Теинк прявт тевтнень, конат апак сюлма ведень лоткавтоманть марто, зярдо весемесь ули анок – лоткавтынк чис-кавто, аволь пель ковс! Бути весементь теемс ломантнеде арсезь, сестэ ошонь эрицятне весементь чарькодсызь ды а кармить пеняцямо».
Тешкстасынек, Севастопольская ульцяванть молиця лембень пачтиця трубопроводонть ташто трубатнень полавтовить одсо, пенополиуретанонь теплоизоляциянь марто. Те лезды вадрялгавтомс лембенть ды веденть пачтямонть Саранскоень эрямонь микрорайонтнэс, конат аштить химмашсо, аламолгавтомс апак учонь зыянов тевтнень, истя жо киртямс сетнесэ лембень ёмавтоманть.
Теде мейле Владимир Волков ваннызе «Мордовия-Арена» строявиця стадиононть вакссо нурька шкань сооружениятнень теемаст туртов тарканть. Кемекстазельть прявт тевть, конат токшить важодемань топавтомань шканть.
Региононь руководителесь макссь питне ЖКХ-нь зярыя объекттнэнь строямонь тевтненень, конат ветявить ЧМ-2018 анокстамонть лувсо, сынст теемась пек эрявикс Саранскойсэ жилищно-коммунальной услугатнень максомань вадрячинть туртов. Кортамось моли ошонь ванськавтомань сооружениятнесэ чудемачинь ведтнень ванськавтомань ды интенсификациянь процессэнь проекттэнть коряс, сонзэ лувсо Мордовиянь прявтошсонть ютавтови покш важодема чугункань кинь вокзалонть маласо улиця коллектортнэнь, канализациянь-насосонь станциятнень одкстомтомань ды одтнэжнь строямонть коряс, Владимир Волков истя жо кармавтсь вадрялгавтомс вокзалонть маласо тарканть, одкстомтомс вокзалонь зданиянь фасадонть, прядомс ванкшномань павильононть вадрлягавтоманть ды эрязкавтомкавтомс Саранскойсэ ды Рузаевкасо чугункань кинь од переходтнэнь тееманть.
«Рузаевкасо ялго ютамонь переходось – прявт объект. Тия ютыть ламо ломанть, секскак сонзэ эряви максомс те иенть прядовомс», – мерсь региононь руководителесь.
Республикань Прявтонь тевтнень нурька шкас топавтыцясь пачтясь, витезь кевкстемась «Находка» лавканть маласо аволь санкционированной ютамонть вадрялгавтоманзо коряс. Тень коряс эрицятнень пельде энялдоматне аволь весть сакшность Республикань Прявтонть лемс.
Истя жо ваннозель чемпионатонтень строявиця гостиницатне – Коммунистическая ды Большевистская ульцятнень киулосонть ниле тештень отелесь ды Кавказская ульцясонть вете тештень отелесь. Кавонест объекттнэсэ тевтне прядовома лангсот. Сексня гостницатне панжовить. Республикань руководителесь кармавтсь виевгавтомс важодеманть гостиницатнень маласо таркатнень вадрялгавтомга. Седе пек те токши Кавказская ульцясо гостиницанть. Тесэ сави топавтомс ламо важодема, истя жо Саранка леень чирень кемекстамось Ботевградская ульцянь сэдьстэнть саезь Большевистская ульцянть видьс. Владимир Волков кармавтсь Саранск ошонь округонь прявтонтень Петр Тултаевнень вадрялгавтомс те тарканть. Тешкстазель, 2018 иеденть мейле тесэ арсеви топавтомс Саранскоень крепостенть вельмевтемань коряс проектэнть.
Теке жо чистэнть Республикань Прявтонь тевтнень топавтыцясь ваннызе футболонь чемпионатонь командатнень-участницатнень туртов тренировкань площадкатнень. «Мордовия» ФК-нь тренировкань площадкасонть строямонь-монтажонь тевтне весе прядозь, видезь газон. Те площадкась ашти Ленинэнь райононь парксонть. Футболонь паксянть ды сонзэ маласо тарканть ванномсто Владимир Волков ледстизе Саранск ошонь округонь прявтонтень те парконть вадрялгавтомань эрявиксчинть. Республикань руководителесь тешкстызе, маласо шкастонть эряви муемс инвесторт ды частно-государственной партнерстванть лувсо вадрялгавтомс те тарканть, теемс сонзэ мельстуицякс ошонь эрицятнень ды инжетнень туртов. «Проектэнть арсемстэ эряви теемс акцент спортонь пельксэнть лангс, Ленинской паркось кармазо активной оймсемань таркакс. Тень пингстэ, нама, а кадомс мельтеме оймсемань тетвнень», – мерсь Владимир Волков.
«Старт» стадиононь тренировкань площадкасонть неень шкане молить тевть газононть туртов меельце слоень ацамонть коряс, видеме кармить июлень колмоце декадастонть. Владимир Волков ледстизе газононь видемань графикенть ды технологиятнень топавтомань эрявиксчинть, сонзэ вадрячинтень иляст уле пеняцямот налксиця командатнень пельде! Кортамось истя жо мольсь площадканть вадрялгавтомадо, валдомтомань теемадо, трибунатнень саемадост. Кортавсть пресс-центрань теемань, футболистнэнь туртов оршамонь-кайсемань нупалень теемадо кевкстематне.
Теке жо чистэнть Мордовиянь Прявтонь тевтнень нурька шкас топавтыцясь ютавтсь промкс Республикань Кудосонть, тосо домкасто кортавсть 2018 иень Футболонь коряс чемпионатонтень ошонь инфраструктуранть анокстамонь кевкстематне.
«Целанек важодемась моли графиктнень коряс. Ансяк эряви виевгавтомс важодемань тевтнень весе объекттнэсэ ды виевстэ кундамс Саранскоенть мазылгавтомантень», – тешкстызе Владимир Волков.
Теде башка, региононь руководителесь ледстизе ломантнень икелепев анокстамонь эрявиксчинть, конат кармить важодеме мундиалень ютавтома шкасто – ярсамонь объекттнэнь персоналось, волонтёртнэ, покш мероприятиятнень ютавтыцятне, – Саранскоев малав 100 тёжат инжетнень самонтень, гостиницатнес сынст пачтямонтень, андомантень, культурань программанть, весе маршрутнэнь эряви арсемс.
«Инжетнень самонть минь учотано уш 2018 иень июнень 10-це чистэнть. Саранскоесь кадовозо мельс кода инжень вадрясто вастыця ды лиятнень ёнов а молиця ош. Весементь ютавтомс пек парсте», – мерсь Владимир Волков.