Владимир Волков ютавтсь промкс Саранскойсэ Универсальной залонь строямонть прядоманзо коряс

Владимир Волков ютавтсь промкс Саранскойсэ Универсальной залонь строямонть прядоманзо коряс

Июлень 6-це чистэ Мордовиянь Прявтось Владимир Волков ютавтсь выездной промкс Саранскойсэ Универсальной залонь строямонть прядоманзо марто сюлмавозь кевкстематнень коряс. Промкссонть ульнесть МР-нь Правительствань Председателесь Владимир Сушков, объектэнь путоманть марто сюлмавозь проектэнь ды строямонь организациянь прявттнэ.

2018 иень прядовомс объектэнь строямодо кортамсто, Владимир Волков тешкстызе, декабрясто Саранскоесь карми вастомо Фигурной кирякстнемань коряс Россиянь Чемпионатонь участниктнень ды инжетнень. «Универсальной залось, апак кавтолдо, лади неть пелькстамотнень ютавтомантень. Теде минь кортынек Россиянь Конькасо фигурной кирякстнемань федерациянь Президентэнть Александр Горшков ды содавикс тренерэнть Татьяна Тарасова марто. Универсальной залсонть ули весемесь истят пелькстамотнень ютавтомга. Секскак эряви вейсэндямс генеральной заказчикень, проектировщиктнень, подрядной строямонь  организациятнень вейсэнь виест, анокстамс тевтнень топавтомань, сынст финансированиянь аравтлувонть ды – кенеремс эрявикс шкантень!»

Ледстясынек, 2018 иестэ Мордовиянтень Саранскойсэ Универсальной залонть строямс федеральной бюджетстэ явозь субсидия 580 миллионт целкоень покшолмасо. Те кармавтоманть тешкстызе Россиянь премьер-министрась Дмитрий Медведев. 

Мордовия Республикань Прявтонть пресс-службась