Субутасто, ноябрянь 19-це чистэ, Республикань Прявтось Владимир Волков ютавтсь промкс "Юбилейный" ЖК-нь омбоце микрорайонсонть од школанть строямонь кевкстематнень коряс. Вастовомань итогокс кармасть пшти кармавтоматне республикань Минстроень ды Минобрань прявтнэнень, истя жо объектэнь генеральной подрядчикентень. Весе кармавтоматнень эряви топавтомс шкастост.
Тавла леенть чиресэ аштиця омбоце микрорайонсонть строявиця общеобразовательной школась - те объект, конась топавтсы райононь эрицятнень вешемаст школань таркатнень коряс ды конань стявтомс Мордовиянтень РФ-нь Правительстванть кармавтоманзо коряс федеральной бюджетстэ явозь субсидия 640 млн.целковоень покшолмасо.
Кода пачтясь Республикань Прявтонтень МР-нь Строительствань ды архитектурань министрась Виктор Цыганов, объектсэнть целанек топавтозь кирпецень вачкамонь тевтне ды 90% топавтозь тевтне латонь тееманть коряс, ёроковсто ветявить тевтне од школантень инженерэнь весе коммуникациятнень ветямост коряс, сынст ютксо лембень ветямоськак. Владимир Волков эштё весть тешкстызе, объектэнть строямонь ды максомань шкась киртязь, сонзэ топавтомга, эряви нолдамс тевс подрядчикень весе вийтнень, важодемань ды техникань весе ресурстнэнь, истя жо тердемс субподрядонь сатышка предприятият. Генеральной подрядчикентень кармавтозь покшолагвтомс важодемань вийтнень, строямонь тевтнень мельга кармавтозь пштистэ ванномс МР-нь Правительствань зампредэнтень Галина Лотванованень.
"Эряви эрьва чистэ ванномс генподрядчикень ды субподрядчиктнень важодемаст мельга, объектсэнть улезэ ламо техника ды важодицят. Школанть эряви максомс шкастонзо!" - тешкстызе Владимир Волков.
Промкссонть ульнесь МР-нь Государственной Собраниянь Председателесь Владимир Чибиркин.