Овторникстэ, июлень 10-це чистэ, Владимир Волков ютавтсь выездной промкс Республикань клинической больницянь виевгавтомань кевкстематнень коряс, тосо истя жо ульнесть Мордовиянь Правительствань председателесь Владимир Сушков ды Здравоохранениянь министрась Михаил Морозов.
Прявт тевтнестэ вейкесь, конатнень путынзе республикань прявтось медучреждениянь од руководстванть икеле, кармась Республикань клинической больницянть юрсо сэредицятненень покш технологиянь лезксэнь явомань лезэв системань теемась. «Ули весемесь, республикань эрицятне ды лия регионсто пшкадицятне получавольть минек Республикань больницянть юрсо покш технологиянь лезкс. Тень туртов улить технологиянь весе возможностне. Покш технологиянь медицинань лезксэнть узкоспециальной тевтнень топавтомаст туртов асатыця кадратнень марто сюлмавозь кевкстематнень эряви витемс куроксто. Нурька шкас тонавтомс минек доктортнэнь – федеральной эли омбо масторонь центратнесэ, бути эряви – тердемс покш классонь специалистт лия региононь медицинань покш центратнестэ. Ды, нама, поладомс важодеманть минек медицинань икеле молиця учреждениятнень юрсо наукань школань тееманть коряс, васняяк – МРКБ-нть», – тешкстызе Владимир Волков.
Сергей Ладяев ёвтнесь юридической вейке лицяс Мордовиянь республикань больницянть ды Перинатальной центранть вейсэндямонь тевтнеде. «Ней минь домкасто тонавтнетяно лия регионтнэнь опытэст, косо неть учреждениятне вейсэндязь ды лезэвстэ важодить, вантано, кода пурныть штатонть, ладить важодеманть. Сентябрясто больницясь ушоды важодеме штатонь од структуранть лувсо ды ярсамопелень, прачкань, хозяйственной службатнень, лабораториятнень услугань вейсэнь максомасонть – неть од ёнкстнэнь совавтомась эряви уш умок», – толковизе МРКБ-нь прявт врачось.
Владимир Волков эштё весть тешкстызе МРКБ-нть федеральной икеле молиця центратнень марто вейсэнь важодемань эрявиксчинть, седе пек телемедицинанть коряс. «Медицинань эрьва кодамо областнень коряс сехте вадря специалисттнэнь марто консультациянь сеанстнэ улест эрьва чинь практикакс, ладязь ды свал шкань. Истямо возможность эряви максомс эрьва «стака» сэредицянтень!»
Теде башка, кортавсть РКБ-в покш технологиянь медицинань лезксэнь явомань покшолматнень финансированиянь лезэнь моделень теемань кевкстематне, те ловови минек республикань ды Мордовиянь шабра регионтнэнь эрицятнень вешемаст мельс саезь. Кортамось мольсь Республикань клинической больницянть юрсо стакасто сэредицятнень ускомаст туртов санитарной авиациянь важодемань ладямонь возможносттнень коряс. Неть кармавтоматне максозь МР-нь Здравоохранениянь министрантень Михаил Морозовнень.
Мордовия Республикань Прявтонть пресс-службась