Инновациянь виевгавтомань эрьва иень рейтингенть коряс, конань анокстыть Экономикань высшей школань эксперттнэ, Мордовиясь совась кемень сехте вадрятнень юткс, саизе 8-це тарканть.
Регионтнэнень максовсь питне инновациянь климатонь лувонть, научно-технической потенциалонть, инновациянь тевтеемань лезэвчинть ды инновациянь политикань вадрячинть мельс саезь. Васенце тарканть саизе Татарстанось, мельганзо молить Московось ды Санкт-Петербургось. Топ-10-тнень юткс истя жо совасть Нижегородской областесь, Башкортостанось, Калугань областесь, Чувашиясь, Томской областесь ды Красноярской ёнксось. Истя, груздязь товартнэнь, топавтозь тевтнень, услугатнень ютксо инновациянь продукциянь пельксэсь саи 28,3%, те малав колмоксть седе ламо Россиянь средней невтевксэнть коряс.
Мордовия Республикась явови нолдазь продукциянь одкстомтомань уровнянть коряс: нолдазь товартнэнь (тевтнень, услугатнень) ютксо рынканть туртов од категориянтень кандовить 7,2% (Россиянть келес средней невтевксэсь эзь пачкоде 1%).
«Республиканть седе тов виевгавтоманть, ломантнень эрямост вадрялгавтоманть удалы топавтомс экономикань весе прявт отраслятнень седе тов одкстомтоманть-паролгавтоманть вельде. Инновациянь производстватнень тееманть лангс нежедемась седе товгак карми минек прявт тевенек», – тешкстызе Мордовиянь Прявтонь тевтнень нурька шкас топавтыцясь Владимир Волков.