Саранскойстэ ливтямодо икеле Хисако Такамадо госпожась якась Иневанькс праведной воинэнть Феодор Ушаковонь Кафедральной соборс.
Япониянь принцессанть, кода профессиональной искусствоведэнть, конась чарькоди живописень ды архитектурань ёнкстнэсэ, ульнесь покш мелезэ эсензэ сельмсэ неемс Равчирень сехте мазый храмтнестэ вейкенть, конась стявтозь неовизантийской купол марто ампирэнь стильсэ.
Сонзэ Императоронь Высочествась покш мель марто ваннызе сырнесэ вельтязь чувтосто теезь иконостасонть, конань алтарень пельксэнзэ светязь иневанькс Фёдор Ушаковонь, иневанькс Серафим Саровскоень ды иневанькс мордовиянь майсицятнень лемс.
Уш храмонть ванномадо мейле, журналисттнэнь марто кортамсто Такамадо госпожась тешкстызе:
- 2018 иесь официальна ёвтазь Япониясо Россиянь иекс ды, нама, Россиясо Япониянь иекс. Ды монень пек мельспаро, тынк масторонть марто монь содавтомась ушодовсь Саранскойстэ, конась кармась Футболонь коряс масторлангонь чемпионатонь ошокс-ютавтыцякс. Васняяк, мон ливтинь тей, минек масторонь команданть кирдеме, секс мекс мон Япониянь футболонь ассоциациянь прявтсо. Паро, минек спортсменттнэ вадрясто налксесть кочкамонь васенце матчсонть, маштызь изнямс виев соперникенть - Колумбиянь сборноенть. Теде башка, колумбиянь командантень пек лездасть сынст ваныцятне, конатнеде "Мордовия Арена" стадионсонть ульнесть пек ламо. Япониясто ваныцятнеде ульнесть седе аламо, ансяк, кеман, минек команданть кисэ "сэредсть" Россиянь эрицятне. Минь невтинек вадря налксема ды изнинек. Кемтяно, вадря ушодксось лезды минек футболисттнэнень 2018 иень Масторлангонь чемпионатонь лия матчтнестэяк.
Такамадо госпожась истя жо тешкстызе паронь арсиця вадря ёжонть, конась редяви Россиясо футболонь коряс масторлангонь первенствасонть: "Покш налксемась - малавгавты эрьва кодамо масторонь ды континентэнь ломантнень, лезды тенст седе вадрясто содамс ды чарькодемс вейкест-вейкест".
Мордовиядонть кортамсто, Сонзэ Императоронь Высочествась видькстась, сон ламо мезе од кармась содамо минек республикадонть, косо ней сэтьмечисэ ды вейкень-вейкень чарькодемасо эрить сядодо ламо раськень ломанть. Покш мель инженть лангс кадсь регионсонть раськень культурань ды искусствань лия ёнов а молиця сюпавчинть ванстомась.
"Монь пек кенярдовтымем, зяро ёроков ломанть чачсть ды кассть тынк моданть лангсо! Ули покш мелем, минек масторонь ломантне истя жо теевельть содавиксэкс тынк культуранть марто, Россиянь эрицятне жо - Япониянь искусстванть марто", - мерсь туемадо икеле Хисако Такамадо.
"Известия Мордовии"