Тешкстазель, целанек Мордовиясо васенце пель иестэнть ормалгадомань коряс тевтне ульнесть свалшкань. Педиця орматнеде – 94604 тевть, ютазь иенть коряс те седе аламо – 11 процентс.
Татьяна Харитонова тешкстызе: ней моли ОРВИ-нь ды ковид-19 коряс сезононь аволь покш касома – меельце таргонть перть касомась кармась 12%.
Республикасонть уш ероковсто моли гриппень каршо ливксэнь путомась, пачтязь вакцинань 380 тежадо седе ламо дозат. Ливкс уш путозь региононь 131 тежа эрицянтень – те 17% весе эрицятнень эйстэ. Арсематнесэ – весе эрицятнень эйстэ 60 % аволь седе аламо ды 74% – эйкакштнень ды сеедьстэ сэредиця ломантнень эйстэ.
Ведомствань руководителесь тешкстызе: гриппень каршо ливксэнь путомань коряс асатышка важодема зярс ветяви важодемань коллективтнесэ.
Артём Здунов мерсь: МР-нь Прявтонть пингстэ региононь промышленной предприятиятнень прявттнэнь сыця советсэнть ули ваннозь иммунизациянь кевкстемась.
Вастовомасонть истя жо кортасть корьсэ сэредемань коряс тевтнеде, истят педиця орматнень профилактикадо, кода геморрагической лихорадка, лептоспироз, лемзиень бореллиоз ды азаргадома.
Мордовиянь Прявтось ды региононь Роспотребнадзоронь руководителесь кортасть «Чистая вода» нацпроектэнть лувсо тевтнень топавтомадост. Те иенть прядовомс арсеви кастомс республикань эрицятнень пельксэнть, кинень пачтяви симемань вадря ведь, ведень пачтямонь централизованной систематнестэ - 92,5 % видьс, ошонь эрицятнень туртов – 97,5%. Текень марто, ламот районтнэнь туртов симемань ведень пачтямонь темась кадови талновтыця кевкстемакс – водопроводонь сеттнень покш пельксэсь таштомсь ды веши полавтома. Тевтнень витемс лездыть федеральной проекттнэ.
Башка мель явозель эйкакштнень тонавтнемань туртов вадря условиятнень теемантень, эйкакштнень андомань ладямонтень ды эйкакштнень туртов шумбрачинь витемань компаниянь анокстамонтень. Истя, кортасть эйкакшонь шумбрачинь витемань лагерьтнень кирдемасо промышленной предприятиятнень асатышка улемадост.
Мордовия Республикань Прявтонь пресс-службась