Кортавсть регионсонть финансонь, эрицятнень финансовой грамотностень ды республикасонть финуслугатнень доступностень кевкстематне, истя жо кибермошенниктнень тевдеемаст а нолдамонь коряс вейсэнь важодемась.
Тешкстазель, социальной эрявикс тевенть топавтомась – регионсонть финансонь услугатнень доступностень кастомась, удалы ансяк весе енкстнэнь вейсэнь тевдеемаст вельде. Республикасонть важоди региононь важодемань группа, ков совить Мордовиянь Правительствань, Россиянь Банконь Волго-Вятской ГУ-нь Мордовия Республикань НБ-нь-Отделениянь, «Почта России» АО-нь, кредитэнь организациятнень, связень оператортнэнь представительтне.
Республикань Прявтось ды Мордовия Республикань НБ-нь-Отделениянь управляющеесь истя жо кортасть регионсонть финансовой просвещениядонть. Алексей Колосков евтнесь эрицятнень эрьва кодат группатнень туртов Россиянь Банконь тонавтомань проекттнэде. Невтемакс, покштнень туртов Мордовиясо важоди «Тьюторы на предприятиях 2.0» проектэсь. Предприятиятнень важодицятне ютыть тонавтома, мейле максыть пурназь содамочитнень мартост важодицятненень.
Таштамковонь 19-це чистэ ушодови школасо ды колледжсэ тонавтницятнень туртов финансовой грамотностень коряс Россиянь Банконь онлайн-уроктнень сексень сессиясь (dni-fg.ru), таштамковонь 21-це чистэ – сыре ломантнень туртов финансовой грамотностень коряс онлайн-занятиятне (pensionfg.ru).
Те иень ожоковсто региононь властень органтнэнь ды ведомстватнень марто вейсэ республикасонть ютавтови «Неделя финансовой грамотности». Проектэсь лезды токамс республикань ламот эрицятнень ды тердемс экспертт министерстватнестэ, ведомстватнестэ, финансовой секторонь организациятнестэ.
Алексей Колосков истя жо евтнесь Мордовиянь Прявтонтень Мордовия Республикань НБ-нь-Отделениянь проекттэнть мокшонь ды эрзянь кельтнесэ просветительской информационной кампаниянть ютавтомань коряс. Васняяк, сон ули аравтозь кибермошенниктнень тевдеемаст а нолдамонтень. Артём Здунов тешкстызе, те тевесь пек эрявикс, сонзэ эряви топавтомс университетэнь сообществанть марто вейсэ раськень кельтнесэ тексттнэнь анокстамонть коряс.
Мордовия Республикань Прявтонь пресс-службась