Республикать стендса целай ши покодсь мокшень и эрзянь кялень школась. Инжихненди можналь ваномс учебно-методическяй, художественняй и просветительскяй литературань выставкать мокшень и эрзянь кяльса, примамс участия эрь кодама интерактивса и мастер-класса М.Е. Евсевьевонь лемса Мокшэрзянь педагогическяй университетть эзда.
Ёмла инжихне содасть мокшень и эрзянь азбукатнень мархта, налхксесть шралангонь налхкомаса и ётнезь online-путешествиять «По страницам народных сказок».
Илань потмоёжа инжихненди казсть «Умарина», «Эряма», «Азорава» ансамбольхнень выступлениясна.
Илань прявкс пяльксть панжеже «Мерема» этнографическяй фольклорнай группась.
«Васенцеда минь ётафттама тяфтама мероприятия, сонь темац пяк эрявикс - «Мордовские языки в информационном пространстве». Мон поздравляндатядязь тинь сембонь, тяп пяк эрявикс культурнай события Мордовиять эряфса», - мярьгсь Мордовия Республикань культурань, национальнай политикань и архивнай тевонь министрсь Светлана Баулина.
Светлана Никитовна лувозе регионтть Оцюнянц Артёма Здуновонь шумбракстоманц:
«Мокшень и эрзянь кялень шинь ётафтомась арась цебярь традициякс минь ламанациональнай годударстванеконди. Пцтай эрь регионца улихть ломатть, конатненди мокшень или эрзянь кяльхне сашендыхть тядянь-алянь кялькс. Пшкядян сюконяма вал мархта теентть, кие кельгсы и ванфтсы эсь кяленц, культуранц, эсь лацонь шинц. Эсь кяльцень кельгоманц эзда сявонди ушеткс патриотизмань касфтомась, Шачем масторти кельгомась. Кяльса ванфтови веконь мудростсь и атяньконь-бабаньконь духовнай питнишисна. Мордовияса мольфтеви оцю покодема кяльхнень, национальнай культурать и койхнень-обуцятнень ванфтомаснон и касфтомаснон-виияфтомаснон коряс. Тянди лездыхть государственнай программань мероприятиятне, а тяфта жа эрь кодама фестивальхне и илатне.
Поздравляндатядязь мокшень и эрзянь шить мархта! Катк эрь кудса кармай ётксоснт шарьхкодема, кельгома и сембе парось. Сяльде кармай лямбе минь мастонь куднеконь – великай Россиять, эрь эряенцты».
Мокшень и эрзянь кяльхнень, культурать, мокшень и эрзянь народтть коензон-обуцянзон ванфтомаснонды путфксонкса, Мордовия Республикань Оцюнять Благодарностенза ульсть максфт: «ИНЕНАРМУНЬ» Мокшэрзянь НКЦ-ть руководителенцты Ольга Лысенкованди (Челябинск ошсь), «Местная мордовская национальная автономия» общественнай организациять председателенцты Ольга Пановованди (Нижний Новгород ошсь), председателю Мокшэрзянь НКА-нь председательти Наталья Савитованди (Татарстан Республикась) и лиятненди.
Шить шумордазе концертнай программась «От Мокши до Суры» «Умарина» моронь и кштимань государственнай ансамбльть эзда.
«Тяфта лиссь, што минь странаньке ламанациональнай, и эрь народть ули эсь оцюдонга-оцю историяц, сонь эздонза появакшни марстонь Россиянь историясь. Кяльхнень, койхнень-обуцятнень, фольклорть эзда и кочксеви минь странаньконь культурац. Тейнек эряви тиендемс мокшень и эрзянь кяльхнень ванфтомати условият. Тя и государствать тевоц и минь, мархтонт», - китькстазе Российскяй Федерациянь Федеральнай Собраниянь Совет Федерациинь сенаторсь Пётр Тултаев.