Сембода мялень салайкс фестивальса арась Гиппократонь клятванц азомац. Сонь марса азозь Медицинскяй институтонь васенце колма курсонь 1600 студентсь. Н.П.Огарёвонь лемса МГУ-са тя церемониясь ётафтовсь ведьгемонцеда ни. Вузонь Мединститутсь, кона тядде васьфтезе эсь 55 кизонц, Россияса фкя инь оцю медицинскяй учебнай комплекссь.
Студенттнень поздравляндамост сашендсь Мордовиянь Оцюнясь Артём Здунов. «Кеман, што кивок мирса ашезь няенде Гиппократонь клятванц тяфтама солидарнайста примаманц, - мярьгсь республикань руководительсь. - Тинь нльне аф шарьхкотькшнесасть, мзяра эсонт вийда. Тинь — цебяренкса бороцяйхть. Тинь — специалисттада, конат каннихть ломаттненди безопасность, конат лезнихть инь стака пингста, сяс теенть тя клятвась пяк торжественнай, сон символичнай, сонь аш границанза. Тейнек ушеткшни од эра — минь ушеткшнесаськ «Огарёв FEST” фестивальнай од движениять. Арьсян, тя арай цебярь койкс минь республикасонк. Поздравляндатядязь тя торжественнай событиять мархта, штоба тинь мяляфтолесть сонь эряфоньберьф. А нинге минь ули эняльдеманьке Луганскяй народнай республикаста земляконьконь эзда. Синь пяк мяльсна, штоба Од кизонь карша марса поздравляндалеськ синь малаткшни илать мархта. Сермадсаськ тя поздравлениять, кона меле теест пачфтеви.
Тёжятть студентсь, конат пуромсть фестивальс, фкя командакс поздравляндазь Луганскяй и Донецкяй народнай республикатнень эса эряйхнень.
Студенттненди приветствиянь валхт стане жа азсть вузонь ректорсь Дмитрий Глушко и Медицинскяй институтть директороц Лариса Балыкова. Казьфтольхть мединститутонь преподавательхне, а стане жа «Ученики Гиппократа» школьникненди и медицинскяй колледжень тонафнихненди олимпиадань сяськихне.
Мордовия Республикань Оцюнять пресс-службац