Мзярс радясна видеоэкранть эзга ванцть, кода одс шачф Софьять анокласазь выпискати, инжихне ванозь приданнайть, конань «Шумбрат, тядяй!» проектть мяльса кирдезь получсесазь шачфтыхне. Виталий Милонов кода лама идень аля шназе наборть и рахсемга мярьгсь: «Котоксть минь ётаме тяфтама казнетнень вакска! А кда корхтамс серьёзнайста, шабать шачемац — тя аф аньцек кенярдема, но и оцю карьхцьт — мзярда сембось эстокиге рамама. Сяс получамс тяфтама приданнай — пяк аф кальдяв».
Од тядять васьфтемац ётась лямбоста — Дарьяти ашесть кирде сельмоведенза, мзярда сон няезе алянц, кона участвовандай специальнай военнай операцияса. Сон нолдаф отпускс и сась шабрань Ульяновскяй областьста, штоба няемс уноконянц.
Фондть эзда казьф наборть эсоль лямбе плед, атнайняти комбинезон, нардама, пелёнкат — сембось, мезе эряви шабати. «Минь оцю кельгома мархта кочкаськ теенть семботь, мезсь кондясти васенце пингть — кеняртькшнек тядянь павазти!» - мярьгсь Наталья Москвитина.
Артём Здунов поздравляндазень од тядятнень-алятнень. «Главнайсь, штоба улель шумбраши — и тядять, и шабать. Паваз и сатфкст тинь семьянтенди!» - седи ваксста арьсесь сон и казсь семьяти национальнай орнамент мархта плед и Мордовиянь медь, а од тядяти — панчфонь пусма. Дарьять алянцты, специальнай военнай операциянь участникти Евгений Михайловиченди, Мордовиянь Оцюнясь пшкядсь тяфтама валса:
«Тонь и служай ялгатнень вельде тейнек ули кода сетьме обстановкаса касфтомс шабаньконь. Сюкпря, мес пяшкотькшнесасть Родинать араламанц коряс священнай долгть!».
Виталий Милонов китькстазе, што аватнень и тядятнень ширеснон кирдеманц коряс Мордовиять передовой опытонц эряви келепнемс сембе странать келес. «Катк шабрань региоттне сявондихть эздонт пример», - арьсесь Госдумань депутатсь.
Лятфтасаськ, «Шумбрат, тядяй!» проектсь ётафтови эряфс региональнай Правительствать мархта Мордовиянь Оцюнять Артём Здуновонь личнай ширень кирдеманц вельде марса «Женщины за жизнь» благотворительнай фондть и РФ-нь Общественнай палатать мархта. Сон сувафтовсь «Сильные идеи для нового времени» форумонь 10 инь цебярь инициативатнень лувксс и няфтьфоль странань Президентти Стратегическяй инициативань агентствать форумонц пленарнай заседаниясонза. Стане жа проектть ширенц кирдезе Русскяй православнай церькавсь и Москувонь и сембе Русень Святейшай Патриархсь Кирилл.
Мордовия Республикань Оцюнять пресс-службац