Ломаттнень шири тушендомаснон коряс прябалась Мордовияса ащи оржаста, ламоц предприятиятнень эса аф сатни рабочай вийсь. Мордовияса эряфс ётафневи 32 инвестпроект, синь лувкссост – 10 од производстват, конат нолдафтольхть тевс тядде. Синь профессиональнай кадраса обеспечендамаснон колга и корхтафоль Советть заседанияса.
«Тя ситуацияса трудонь и занятостень министерствати эряви работамс кода оцю кадровай служба эрь предприятияти, - китькстазе Артём Здунов. – Республикаса 10 тёжятть вакансия, эздост 7 тёжяттне – рабочай профессиятнень коряс. Кадрат эрявихть и велень хозяйстваса, и промышленностьса. Минь сяда тов ётафнесаськ эряфс 32 инвестпроектть. Мушенттама средстват, водендакшнесаськ синь федеральнай бюджетста». Тядде келептьф «Рузаевка» ТОСЭР-сь, коса панчф ни 1069 рабочай васта и сяда тов панжеви нинге тёжянь вакансия.
«Мон спасибан бизнести – сятненди, кие мрдась республикав, тейнек тяп як важна», - мярьгсь Артём Здунов.
Мордовиянь Оцюнясь стане жа китькстазе, што важна сярьгятькшнемс республикань предприятиятненди работама вузонь и СПО-нь учреждениянь выпускникнень, тяконь лувксса лия региоттнень эзда.
«Тейнек важна анокламс кадровай стратегиять марса Н.П.Огарёвонь лемса МГУ-ть мархта, - мярьгсь Мордовиянь Оцюнясь. – Сай кизоть Россиянь Президентсь азозе Семьянь кизокс. Минь республикаса азоськ сонь Трудовой династиянь кизокс. Пара мялезон, мес республикасонк эздост алам, Синь эрявихть ванфтомс».
МР-ть эзга МВД-нь миграциянь кизефкснень коряс управлениять начальникоц Борис Мандрус пачфтсь трудовой мигранттнень мархта тяниень ситуациять колга.
МР-нь социальнай защитань, трудонь и населениять заняфшинц коряс министрсь Игорь Князьков азондсь сянь колга, кода ащихть тефне трудонь рынкаса. Тяддень 10 ковста ули миграционнай аф оцю касома республикань 13 райоттнень эса.
Республикань Оцюнясь китькстазе, што тя результатсь эряви кемокснемс. «Карматама сяда тов работама Мордовияв ломаттнень мрдафнемаснон коряс», - мярьгсь Артём Здунов.
Заседанияса одукс кочкафоль Мордовия Республикань Оцюнять видеса Директоронь советть председателец Геннадий Громов – «МордовАгроМаш» АО-ть управляющай директороц.
Мордовия Республикань Оцюнять пресс-службац