Креативнай индустриянь виияфнемань агентствась и «Монь Мордовиязе» экспертнай клубсь арьсесь деловой и фестивальнай программа. Форумть ётафтоманцты поладсть республиканскяй ведомстватне, од ломанень, культурнай и образовательнай организациятне. Дискуссионнай площадкать работаса примась участия 30-да лама федеральнай и региональнай эксперт 12 ошста. Форумсь макссь возможность творческяй специалисттненди пачфтемс эсь колгаст.
Деловой блокть пингста форумонь участникнень мархта Н.П.Огарёвонь лемса МГУ-нь «Точка кипения» центраса корхнесь Мордовиянь Оцюнясь Артём Здунов. «Ся, што минь республиканьке креативнай — минь кемокснесаськ мекольдень кизоть мялень салай лама мероприятиянь ётафтомать мархта. Тяфтамотнень, кода «Геройхнень пингсна» премиясь, кона арси ни всероссийскяйкс, од ломанень театрать работац и ламось лиясь. Мзярда тяфтама мероприятият улендихть регионца — тя креатив. Мордовиясь — креативнай республика, Саранскяйсь — креативнай ош, но тя оцю работа», - мярьгсь республикань руководительсь.
«Мзярда минь корхтатама креативнай идеятнень колга, главнайсь — синь улест водендафт федеральнай и региональнай уровеньца аф фкя лацонь задачатнень решандамаснонды», - мярьгсь спикерхнень ёткста фкясь, «Мастерская новых медиа» сообществать руководителец Евгений Клещ.
Искусственнай интеллектть и сонь сай пингонц мархта сотф темати шарфтфоль башка оцю мяль.
Н.П.Огарёвонь лемса МГУ-нь ректорсь Дмитрий Глушко азондсь креативнай индустриянь сфераса креативнай специалистонь анокламать колга.
Сатфксонь сатомань эсь историяснон колга пачфтсть Мордовиянь инжихне. Историческяй застройкань сфераса опытонц квалма азондсь Рязанскяй областень Елатьма посёлкаста «Дом с характером» проектть руководителец Татьяна Алимова. «ДаншиноФЕСТ» Всероссийскяй историко-культурнай фестивальть исполнительнай директороц Наталья Андреева азондсь национальнай культурать содафокс тиендемаса цебярь наработкатнень колга.
Форумть пленарнай заседаниянц пингста няфтьфоль «Завод 1901» креативнай кластерть фирменнай стилец и логотипоц. «Тяфтама васттне лезнихть касондомс-вииякшнемс творческяй ломаттненди тязкс, провинцияса», - китькстазе Мордовиянь Креативнай индустриятнень виияфнемань агентствать гендиректороц Геннадий Бутарев.
Деловой модельти сувафтфтольхть 10 тематическяй секцият. Тя и «Театральное искусство», и «Архитектура», и «Городская среда», и «Внутренний туризм», и «Современное искусство», и «Креативные СМИ».
Мордовия Республикань Оцюнять пресс-службац