Республикань Кудса 21 сентябрьста чествовандафтольхть Мордовиянь ломаттне, конат лемдезь эряфснон родной республикаснонды, эсь трудснон мархта сатсть няевикс сатфкст Россияти и Мордовияти служамаса. Казнетнень максозень Мордовиянь Оцюнясь Артём Здунов.
«90-це кизотнень, историческяй событиятнень тиендевомста, эрявсь неже, конань лангс республикати улель кода нежедемс, тяфтама документть эвондамац пяк эрявсь. Лувондса, што тя фкя инь мяляфтови, эпохальнай события эрь народти, эрь субъектти — Конституциять примамац, - китькстазе республикань руководительсь. - Минь Конституцияньке тиф Российскяй Федерациянь Конституциять мяльса кирдезь — минь ащетяма единай правовой пространстваса. Работаньконь принципонза и минь основной питнишиньке путфт регионть документозонза».
Артём Здунов башка отмечазень СВО-нь участникнень, конат обеспечендакшнесазь странаса мирнай эряфть, спасибась сембонди, кие лезни лезни странаньконди сяськондемс сталмотнень и пельксть.
Азфоль, што Мордовиясь получась МР-ть Конституциянц мархта лама поздравления федеральнай властень сембе уроветтнень эзда. «Тейнек тя важна — субъектоньконь, Россиянь коренной народть лангс мялень шарфтоманкса. Минь сембе Россиясь, минь ладязь эрятама, сатнетяма мир и согласия республикасонк», - мярьгсь Мордовиянь Оцюнясь.
Россиянь Президентть Указонц мархта Ялгаксшинь Орденца казьф «Союз композиторов России» Мордовскяй региональнай организациять председателец, Мордовиянь гимнать музыканц автороц Нина Кошелева. «Сюконян трудозенди оцю оценкань максоманкса. 50 киза ни мон работан Мордовиянь и Россиянь музыкальнай искусствать виияфнеманкса. Тя пингста тяштьф 300 произведения. Но сембода главнайсь — Мордовиять государственнай гимнац. Мон кельгса эсь родиназень, эсь народозень — именна тя максси тейне вдохновения!» - мярьгсь композиторсь.
«Отечествать инголе заслуганкса» II степенень орденонь медальса казьф Ардатовскяй светотехническяй заводонь холодноштамповочнай оборудованиянь наладчиксь Василий Мишанов. «За отвагу» медальсь максф Ковылкинаста специальнай военнай операциянь участникти Александр Сандрюковонди, Лука Крымскяень медалец — 4-це Республиканскяй клиническяй больницянь медицинскяй сестрати Марина Манеровати.
Мордовия Республикань Оцюнять Указонц мархта «За смелость и отвагу» отличиянь знакса казьфт С.В.Катковонь лемса Республиканскяй клиническяй больницянь врачсь-анестезиологсь-реаниматологсь Кирилл Лёвкин и 4-це Республиканскяй клиническяй больницяста сонь работай ялгац Сергей Шамов.
«За самоотверженный труд» отличиянь знакса казьф трудонь ветеранць Александр Живаев — 47 киза сон работась велень хозяйстваса, вятезе республикань тепличнай предприятиять. «Мордовия Республикать виияфнеманцты личнай путксонкса» почётнай знакса казьфт 1-це Ромодановскяй средняй школань директорть учебнай работать коряс заместителец Татьяна Белоглазова и трудонь ветеранць, писательницась Валентина Мишанина.
МР-нь Конституциять шинц мархта пуромфнень поздравляндазень Мордовия Республикань Государственнай Собраниять Председателенц заместителец Сергей Вдовин.
Мордовия Республикань Оцюнять пресс-службац