«Од политиконь школа» проектсь — тя комплекснай программа, кона водендаф од ломаттнень политическяй социализацияснонды, а стане жа региононь од лидерхнень эффективнай работати профессиональнай политическяй анокламаснонды. Проектсь работай 2015 кизоста сявомок, од политиконь школаса тонафнема ётасть 500 участниксь.
Артём Здунов китькстазе, што од ломаттнень виияфнемасна ащи сянь эзда, кода синь водендакшневихть обществать экономическяй, общественно-политическяй и социокультурнай эряфонцты. Именна тя цельхненди и отвечай «Од политиконь школась»
Аньцек мекольце кафта кизотнень Школань 30 инь цебярь тонафнись ульсть Москуса и ванозь Государственнай Думать и Федерациянь Советть.
«Странань Президентсь аф весть китькснезе, што од ломанень политикась — государствати стратегически важнай направления, - азозе Артём Здунов. - Минь шарьхкотькшнесаськ: ётай 10-12 киза — и тинь, тячиень од ломаттне, сатада властти. Од политиконь школа образовательнай программась лезды теенть максомс оценка сембе основной процессненди, конат тиендевихть обществасонк. Теенть эряви шарьхкотькшнемс, кепотьксонди, што странасонк аф сембе общественнай организациятне мольфтихть конструктивнай работа, улихть и тяфтамот, конат западнай государстватнень ярмакснон лангс путнихть эсь инголест цель срафтомс-калафтомс общественно-политическяй стройть».
Од политиконь школась водендаф сянди, штоба од ломаттне шарьхкотькшнелезь сембе ня процесснень, штоба теест улель кода ётафтомс эряфс эсь проектснон и инициативаснон.
«Монь пингстон, мзярда улень тинь кизосонт, тяфтама кели возможностть ашельхть, - мярьгсь республикань Оцюнясь. - Сяс кда тинь саде тяза седиентень тердеманц коряс, минь кирдьсаськ ширентень. Тинь — минь кадровай резерваньке».
Мордовиянь Госсобраниянь спикерсь Владимир Чибиркин китькстазе, што проектонь участникнень лувкссна касонды, ётай кизотнень Школань выпускникне работайхть ни партиять структураса, сувасть од ломанень парламентть составс, арасть лездыкс депутаттненди.
«Молодая гвардия Единой России» Всероссийскяй общественнай организациять Мордовскяй региональнай отделениянц Региональнай штабонц руководителец Данил Ульянов азозе, кода кармай ётнема тонафнемась. Ковоньберьф ётафтови 15 тематическяй васедема. Кармайхть кинолекторийхть, мастер-класст, экскурсият, творческяй заданият.
Од политиконь школань участникнень приветствовандазь проектонь сембе пингонь лекторхне. МР-нь Государственнай Собраниянь депутатсь, республикань Государственнай Собраниять видеса Од ломанень парламентть Председателец Виктория Богдашкина отмечазе: «Тейне удлась улемс спикеркс Од политиконь школать тяда ингольдень составсонза, улемок Государственнай Собраниянь инь од депутатокс. Проектонь участникне фалу ульсть активнайста водендафт диалогти, макссесть кизефкст, комментарият».
Проектть сяда товолдонь виияфнеманц колга азондсь 2023 кизонь Од политиконь школань выпускниксь, Н.П.Огарёвонь лемса МГУ-нь Историко-социологическяй институтонь 2 курсонь студентсь Денис Меркульев.
Мордовия Республикань Оцюнять пресс-службац