Оптическяй волокнать производствац ушеткшневи 8 этажса башнять инь сери вастсонза. Именна тоса специальнай загатовкатнень эзда ушеткшневи волоконнай светодиоттнень - шуванядонга шуваня клянцеконь сюренятнень усковомасна. Тяниень пингть заводсь ноляй телекоммуникационнай оптическяй волокнань кафта типт. 2021 кизоня предприятиясь тонадозе продукциянь од типть. "Ростелеком" ПАО-ть планонзон коряс именна тя стандартонь оптическяй волокнать арьсекшневи нолдамс тевс сай пингонь "Европа - Азия" TEA NEXT связень магистральнай транзитнай волоконно-оптическяй линияса, кона должен касфтомс кафта континенттнень еткса информациянь максомать.
Эряви азомс, што васенда заводса арьсекшневсь нолямс 2,4 миллион вайгяльбень кувалмоса волокна кизоти. РФ-нь промышленностень виияфнемань фондть ширень кирдеманц пингста предприятиясь етафтсь эряфс 4 миллиотт вайгяльбес мощносттнень касфтомаснон коряс проект. Но тяниень пингть предприятиясь работай аф сембе вийса. Мезе тиемс тевть петеманкса - тянь колга корхтафоль специальнай совещанияса.
Корхтамать ушедомста Артём Здунов китькстазе производствать омбоце очереденц эрявиксшинц. Тяса кармайхть нолявома волокнать производстванкса заготовкатне. Проектсь етафтови эряфс марса "Роснаноть" мархта.
"Но тяда инголе эряви лувомс сембе экономическяй параметратнень, тиемс анализ рынкати, штоба лац шарьхкотькшнемс сонь объемонзон, - мярьгсь Мордовиянь Оцюнять аф лама пингс тевонзон тиендисна. - Заводть омбоце очередец должен эвондамс!"
Кода азозе предприятиять генеральнай директороц Андрей Николаев, 5 кизоста "Оптиковолоконные системы" АО-сь нолдась 7 миллионда лама вайгяльбень кувалмоса оптическяй волокна. Компаниять клиентонза Россиянь и Беларусень инь оцю кабельнай звоттне. Продукциясь сертифицировандаф Россияса, сонь качествац кемокстаф российскяй и омба масторонь партнерхнень мархта, тяфтамотнень кода "Sumitomo Electric Industries", "Ростелеком" ПАО-сь, "Мегафон" ПАО-сь, "МТС" ПАО-сь, "Транснефть" ПАО-сь. Тяка пингть кирдемс омба масторонь производительхнень конкуренцияснон фкя и тяка отечественнай предприятияти-производительти аф теждя. Мордовиянь Оцюнять аф лама пингс тевонзон тиендисна башка мяль шарфтсь: регионть уровеньца пцтай мезевок аф тиендеви тяфтама предприятиять ширенц кирдеманкса. Хуш республикаса пуроптф "Волоконная оптика и оптоэлектроника" специальнай класстер. Артём Здунов ашезе шна кластерть работанц.
"Мезенди тиф тя кластерсь? Штоба касфтомс предприятиятнень конкуренциянь кирнемаснон, получамс мультипликативнай эффект. Кие вятьсы кластерть управляющай компаниянц? Мес сон аш минь совещаниясонк - кизефтезе Артём Алексеевич МР-нь промышленностень, наукань и од технологиянь министрть Александр Седовонь. - Мзярс няеви аньцек фкясь: што кластерсь ули аньцек кагод лангса! Но тянь ули кода петемс! Тяникиге пуроптость Советть заседаниянц и ладясть тя работать!"
Стане жа Мордовиянь Оцюнять аф лама пингс тевонзон тиендисна шарфтсь мяль сянди, што аш ладяф марстонь работа предприятиятнень и Технопаркть еткса, коса тиеви волоконнай оптикань Инжиниринговай центра, кона, кода арьсекшневи, кармай заняф оптическяй волокнань специальнай виттнень анокламаснон мархта.
Мордовия Республикань Оцюнять пресс-службац