Мордовияса кочкаф 2 миллионда лама тонна сёра — тя историческяй результат и инь цебярь показательсь ПФО-нь региоттнень ёткса. Республикань паксятнень лангста нинге мзярдовок апак кочксеколь тяфтама урожай!
Тядде «Зрнянь сёксе-2023» Всероссийскяй агропромышленнай выставкаса республикань аграрийхне сатсть 31 казне. 25-сь ёткстост — зрнянь. Эрь медальть эшксса оцю труд, эсь тевценди кельгома, мяль эреклафтомс велеть и ламолгофтомс аграрнай койхнень-обуцятнень.
«Модать лангса работай ломанць ульсь и лядонды юркс обществати, тя сонь виец и козяшиц. А стака пингста — нежедема вастоц. Сюкпря сембонди, кие покода паксятнень лангса, велеса, фермаса, перерабатывающай предприятиятнень эса. Сюкпря тинь трудонтень, Родинати кельгомантень инкса, мес машттада и мяленте работамс семьянтень, Мордовиять, оцю странаньконь инкса. Тинь виентень вельде Мордовиянь АПК-сь ламода полафтсь, арась конкуренциянь кирдикс, высокотехнологичнайкс. Башка спасибамань валхт аграрийхненди, конат фалу примсихть участия военнослужащайхненди и од региононь эряйхненди гуманитарнай лезксонь прважамаса. Минь боецоньке топодстот, мезьсовок аш вешфкссна. И тя тинне заслугась», - мярьгсь Мордовиянь Оцюнясь Артём Здунов.
Тячи Мордовиянь товархнень ули кода няемс аф аньцек Таможеннай союзонь, прилавкатнень лангста, но и Азиянь , арабскяй миронь странатнень эса. Республикань аграрийхнень вельде латцеви стратегическяй партнёрства Китайть, Беларуссиять, БРИКС-нь и СНГ-нь странатнень мархта. Стане жа цебярь соткст латцевихть Херсонскяй областть и подшефнай Каланчакскяй округть мархта. Тяса мишендеви ни минь продукцияньке, кона кельговсь тястонь эряйхненди.
Мордовиянь аграрийхненди лямбе валхт азсть Российскяй Федерациянь Федеральнай Собраниянь Государственнай Думань Комитетть председателенц заместителец Юлия Оглоблина и Россиянь Велень хозяйствань министерствань Велень территориятнень виияфнемань департаментть директоронц заместителец Виталий Платонов. Сон лувозе РФ-нь велень хозяйствань министрть васенце заместителенц Оксана Лутонь пшкядеманц:
«Мордовиянь агропромышленнай комплекссь тяга весть няфтсь оцю профессионализма, обеспечендазе отраслять апак лотксек работаманц и касфтозень ключевой сембе направлениятнень коряс производствань объёмтнень. Сюкпря теенть трудонтень и достойнай результатонтень инкса».
Торжественнай обстановкаса отраслянь представительхненди максфтольхть государственнай казнет. Тяфта, республикань агропромышленнай комплексса оцюдонга оцю сатфксонь сатоманкса Мордовия Республикань I степенень Славань орденца казьф Темниковскяй райононь «Подсобное хозяйство» ООО-ть генеральнай директороц, мокшалясь Григорий Самолькин. Мордовия Республикань II степенень Славань орденца казьф «Хлебозавод» АО-ть генеральнай директороц, мокшавась Вера Осипова. Кой-кинди максф
«Российскяй Федерациянь велень хозяйствань Заслуженнай работник» почётнай лемсь.
Кой-кит аграрийхнень ёткста чествовандафтольхть семьянек. Семейнай ферматнень ёткста сяськикс кочкафоль Ичалковскяй районцта Валерий Сидоровонь фермац. Семьясь кирди 78 оцю сюра жувата. Мирттнень-рьвятнень 11 идьсна.
Сявомок мяльс велень хозяйстваса тяддень сатфкснень кочкафтольхть сяськихть и муниципалитеттнень ёткса. Казнет получасть Инсарскяй, Рузаевскяй и лия райоттне. Стане жа казнет получасть инь цебярь студенческяй трудовой отряттне.
Мероприятиясь шумордавсь мялень салай концертса, конань аноклазь государственнай филармониянь артисттне.