Республикань Оцюнясь китькстазе: Тундань и Трудонь Шись - ила, конац марстопнесы сембе обществать. «Азан оцю благодарность сембе производствань отраслянь и социальнай сферань представительхненди. Сянь эзда, кода уверенна и лац кармайхть покодема минь предприятиянеке, сотф сотф порядкась и стабильностсь, вандыень шить эса ломаттнень уверенностьсна», - мярьгсь республикань руководительсь.
Мордовиясь и тя кизоть кирди вишке трудовой ритма. Аф кунара, кода китькстазе Артём Здунов, пилотфтома технологиянь сфераса республикань проектсь ульсь няфтьф Президентти и сявсь оцю оценка.
«Тя минь Мордовияньконь од инновационнай системать элементонзон эзда фкясь, - мярьгсь регионтть руководителец. – Мялезе азомс оцю сюкпря сембе инвесторхненди, кие верондай Мордовити».
Тяниень пингть республикаса ётафтфт эряфс инвестпроектт марстонь инвестициянь объемса 40 млрд. цалковайть малава. Цебярьхть республикать касомань показателенза промышленностьса, велень хозяйстваса. И сембе ня сатфксне,кода китькстазе Артём Здунов, тиендевихть эрь кодама профессиянь ломанень кядьса.
Республикань Оцюнясь башка китькстазе: тяни пяк эрявикс марс кирдемась, покодемасонга. Аньцек марс можнат тиемс эхянь стака задачатнень. Регионтть лидероц сюконясь предприятиянь руководительхненди и и трудовой коллективненди СВО-нь участникнень и синь семьяснон кирдемаснон инкса. Тя тожа оцю марстонь тев.
Тяфта жа Артём Здунов азсь сюконяма валхт государствань Оцюняти. «Кода минь сембе содасаськ Президентть посланияста, кармайхть нолявама тага тов национальнай проекттне. Минь появай лама проектоньке од семиянь, од ломанень кирдемать коряс. Тейнек тяп пяк эряви», - мярьгсь Мордовиянь Оцюнясь.
Россиянь Социальнай фондонь председательсь Сергей Чирков, илафтозь республикань эряйхнень, китькстазе: «Мордовиясь - тя труженица! Мон тянь лац содаса. Тяфтама экономикань ширде касома-вииямама, кодама няфни республикась, пяк питни. Теень пяк пара мялезон улемс тя мероприятиять эса, особенна кда лувомс тя фактть, што Мордовиясь вафневи теень роднойкс – монь бабазе шачсь Зубово-Полянскяй районца. Мода вакс нолцеса прязень эрь труженикти и сембе покодемань династиятненди».
Торжественнай собранияса ётась трудовой соперничествань сяськихнень азондомасна. Промышленностень предприятиятнень ёткста ётни сяськиень знамясь ульсь максф Саранскяень приборостроительнай заводть, Ардатовскяй светотехническяй заводть, АО «Лидер – Компаунд» трудовой коллективснонды .
Агропромышленнай отрасляса сяськикс арасть «МордовАлкоПром», «Октябрьская» агрофирмась, ООО «Исток» Рузаевскяй муниципальнай райононь, строительствань отрасляса - «Мордовдорстрой»-сьи Анелия»-сь.
Жилищно-коммунальнай хозяйствань сфераса сяськиень знамясь етась «Россети Волга» - «Мордовэнерго» публичнай акционернай обществань филлиалть коллективонцты, информатизациянь и связень отрасляса - «Почта России»-нь региональнай управленияти.
Шумбрашинь ванфтома отрасляса инь цебярькс арасть №5 Республиканскяй клиническяй больницять и Рузаевкань центральнай районнай больницять коллективсна, образованиянь сфераса - Республиканскяй асу идень лицейть и Торбеевскяй сиволень и ловцонь промышленностень колледжть коллективсна, культурань сфераса – А.С. Пушкинонь лемса Национальнай библиотекать коллективоц, социальнай обслуживаниянь сфераса - Потьминскяй психоневрологическяй интернатть идень отделения мархта Зубово-Полянскяй муниципальнай райононь и Ичалковскяй районтть коряс Социальнай защитань учреждениянь коллективне .
Трудовой соперничествань сяськиень знамясь предпринимательствань отраслять предприятиянзон ёткса ульсь максф «Констант» ограниченнай ответственность мархта обществати, «Потребкооперация» отрасляса - «Большеигнатовское» потребительскяй обществань коллективти.
Республикань Оцюнять мархта 2024 кизось лемтьф трудовой династиянь Кизокс. Трудовой династиятне – кенярдема и кирдема эрь коллективть потмоса.
Мордовия Республикань Оцюнять приказонц мархта поколениянь преемственностть ванфтоманкса и семьянь покодемань коень арьсеманкса Почетнай дипломса и знакса «Лучшая трудовая династия Республики Мордовия» казьф Панинттнень покодемань династиясна, конат покодихть «Ардатовский светотехнический завод» акционернай обществаса. Марстонь покодемань стажсна - 176 киза.
Почетнай дипломса и знакса «Лучшая трудовая династия Республики Мордовия» тяфта жа казезь Давыдовнень покодемань династияснон – синь работайхть «Рузаевский завод химического машиностроения» акционернай обществаса. Династиять марстонь покодемань стажец - 162 года.
Тяфтама жа награда ульсь максф Мазоновнень династияснонды, конац покоди «Мордовцемент» акционернай обществаса, и Зуботыкиттнень династияснонды – синь покодихть образованиянь сфераса.
Трудовой династияв эрь сувайти панф весть максови премия – 1000 цалковай эрь покодьф кизоть инкса.
Торжественнай собраниянь участникнень тяфта жа поздравляндазень Мордовия Республикань профсоюзонь Федерациянь председательсь Сергей Борисов. Ётась «Коллективный договор – основа защиты трудовых прав работников» эрь кизонь пялькстомать сяськиензон каземасна. Сонь эсрнза примсесть участия предприятиятне и сембе собственностень формань организациятне.
3 степенень лауреатонь диплом получасть Ковылкинскяй электромеханическяй заводсь и «Газпром газораспределение Саранск» АО-сь.
2 степенень лауреатонь диплом казсть «Сарансккабель-Оптика» ООО-ть коллективонцты.
1 степенень лауреатонь диплом казсть «Ликероводочный завод «Саранский» ООО-ти.