Компаниясь ётафнесыне эряфс инновационнай продукциять нолдаманц коряс арьсеф планонзон. Кизоньберьф нолдафтольхть алюминиевай сплавста подвижной составонь эсь лацонь колма модельхть: хоппер-минераловоз, кеме азотнай кислотанди цистерна и сжиженнай природнай газонь пачфнеманкса контейнер-цистерна. Инвестиционнай программать мяльса кирдезь шумордакшневихть эсь разработкань тележкать рынкав лихтеманц коряс работатне, мезсь лезды компанияти кемокстамс инновационнай подвижной составонь сегменца эсь улеманц. Ушетф сжиженнай криогеннай газонь пачфнемань и ванфтомань од перспективнай рынкать занцемац. Маластонь пингть арьсекшневи сертифицировандамс грузовой подвижной составонь нинге колма модельхть.
Мордовиянь Оцюнясь китькстазе: «Тяниень пингть эряви ванфнемс инвестиционнай активностть. Аф ваномок сембе стакатнень-сталмотнень лангс, тейнек удалась касфтомс производственникнень ширеснон кирдемаснон. Лама кизоста васенцеда максфт субсидият од оборудованиянь рамаманкса карьхцнень мрдафтоманкса, максфт грантт оборотнай средстватнень пяшкодеманкса».
Республикань руководительсь азозе: важна полаткшнемс сяда тов предприятиятнень эса социальнай ширень кирдемань программатнень, касфнемс заработнай платать.
Кизоть итогонзон коряс средняй заработнай платась «РМ Рейл» предприятияса касфтовсь 14 процентта. Компанияти удалась сувамс Россиянь инь цебярь работань макссихнень лувксс, занямок 44 вастть.
«РМ Рейл» компаниять генеральнай директороц Максим Тевс мярьгсь: «Аф ваномок стакатнень-сталмотнень лангс, предприятияньконди удалась ванфтомс касондоманц-вииякшнеманц. Тянь мархта минь тиенттяма путкс республикать и странать экономикаснон кемокснеманцты. Сай кизонди минь путнетяма инголенк аф сяда ёмла задачат. Кеман, синь тейнек пяшкодевомшкат».
Мордовия Республикань Оцюнять пресс-службац