«Школаса тонафнемань кемонь кизотне няевихть тейнек сембода кувакакс. Минь мяляфнесаськ учителеньконь, одноклассниконьконь. Сембе тя пингть мельганк ваныхть учителеньке: кода минь касонттама-вииякшнетяма, ёмла шабаняста касонттама оцю ломанькс, конат мольфтьсазь инголи экономиканьконь, пчкафнесамазь, ламотне синць арсихть учителькс. Россияса тя фкя инь важнай профессиональнай илась!» - мярьгсь региононь руководительсь.
Артём Здунов китькстазе, што республикань педагокнень честностень, афкуксонь ломанькс и пара ваймокс улемань уроксна аф ётнихть шавос. Учительхне воспитандазь минь боецоньконь, геройхнень, конат тяни смелста арсихть Родинать аралама.
Мордовиянь педагокнень оцю профессионализмаснон колга корхтайхть всероссийскяй конкурснень эса эрь кизонь сатфкссна. Тядде странань инь цебярь педагокнень ётксот Марина Николаевна Фёдорова — Саранскяень 5№ идень садонь воспитательсь, кона занязе омбоце вастть «Родной кялень и родной литературань инь цебярь учительсь — 2023» Всероссийскяй конкурсса, Светлана Николаевна Федотова, Байкузовонь лемса машина кинь транспортонь Рузаевскяй техникумонь спецдисциплинань преподавательсь, - сон сувась комсь инь цебярь педагокнень лувксс «Мастер года — 2023» профмастерствань конкурсса.
Азфоль, што колма кизонь топодемс стаж мархта од специалистсь тяниень пингть трудендайхть отрасляса. Педагогическяй вузонь и педколледжень старшай курсонь пцтай 200 студентсь работайхть ни школаса. Штоба тяфта улель и сяда тов, башка мяль кармай шарфневома «Земский учитель» программать виияфнеманцты, а стане жа школатнень эса кадровай прябалать решандаманцты, коса ули учителень-предметниконь аф сатнема.
Регионца койс коре шарфневи мяль образовательнай инфраструктурать виияфнеманцты. Тядде 1450 вастонди од школа панжевсь Саранскяйса — тя фкя инь тяниень пингонь образовательнай учреждениясь. Мольфтеви Саранскяйса и Белозерьяса 600 и 165 вастонди школатнень строямасна. Капитальнай ремонтонь программать коряс петьф 32 школьнай здания. Тяни республикаса панчф пцтай 159 «Точка роста» центра — тя велень школатнень 90 процентсна.
«Конешна, инфраструктурать эзда ащи касы поколениять сознанияц, мзярда перьфпяле ару и сембось тяниень пингонне, - китькстазе Артём Здунов. - Но сембода главнайсь — тя содержаниясь. - А содержаниять инкса ответственнайхтяда именна тинь — педагокне. Спасибан сембонди, кие любой стака пингста лядондсь отрасляса. Кошарясайне од ломаттнень сявондемс пример ветераноньконь, заслуженнай учительхнень эзда. Синь макссть мирти и Россияти мощнай специалистт, конатнень инкса минь марятама гордость».
Мордовиянь Оцюнясь надияфтсь, што республикань руководствась фалу кармай кирнема образованиянь сферать ширенц, штоба педагокне достойнайста работальхть и маряльхть гордость эсь профессияснон инкса.
«Россиянь Президентсь мярьгсь: «Педагоксь — тя аф профессия, а миссия!» Тейнек важнай государственнай задачась — тиемс сяда виикс шабаньконь, штоба ащемс каршек сембе пельксненди!» - мярьгсь региононь руководительсь.
Мордовиянь поспитательхненди, учительхненди, преподавательхненди и наставникненди тя шиня максфоль лама казне. Тяфта, Российскяй Федерациянь Президентть Почётнай грамотанц мархта казьфт Саранскяй политехническяй техникумонь преподавательсь Галина Денисова и Зубово-Полянскяй райононь Жуковскяй средняй школань директорсь Виктор Кистанкин. «Мордовия Республикать инголе заслуганкса» медальса казьф Саранск ошень округонь 1№ Идень музыкальнай школань преподавательсь Владимир Стеньшин — 50-да лама киза сон макссь од музыканттнень воспитандамаснонды. «Мордовия Республикань Народнай учитель» лемсь максф Асу шабанди Республиканскяй лицеень директорть заместителенцты Сергей Сабаевонди — сонь учениконза Россиянь национальнай сборнай командать лувксса сатсть 11 зрнянь и 4 сиянь медальхть.
200 тёжянь цалковаень лувксса ярмаконь премиянь получаманкса всероссийскяй конкурсонь, конань ладязе странань Президентсь, сяськикс арасть Мордовиянь инь цебярь учительхне. Премиять сатыец, Рузаевскяй райононь 7№ школань биологиянь и химиянь учительсь Елена Антонова, кона получазе казнеть омбоцеда ни, мярьгсь: «Мон кемоста тонадыне фкя правилать: учительти эряви касондомс-вииякшнемс, лиякс сон лоткай улемда учителькс, примеркс. Кеняртьфти, што тяниень пингть образованияти, школати и учительти шарфневи башка оцю мяль. Сембось тя кошарясыйне педагокнень трудендамс сядонга лац!»
Тяниень эряфса наставникнень лангса ащи оцю ответственность. Тянь колга эсь выступлениясонза мярьгсь Мордовия Республикань Оцюнять премиянц сатыец, Атяшевскяй райононь 1№ Поселковскяй средняй школань историянь и обществознаниянь учительсь Ирина Батяркина: «Мон кода историянь учитель шарьхкотькшнеса патриотонь и эсь странань гражданинонь касфтомаса профессиязень важнайшинц. Тяниень условияса педагокненди инь главнай задачась — воспитандамс афкуксонь патриотт. Тянь и карматама тиендемонза сяда товга!»
Пуромфнень поздравляндазь стане жа МР-нь Госсобраниять Председателец Владимир Чибиркин, РФ-нь сенаторсь, Федерациянь Советонь Наукать, образованиять и культурать коряс комитетонь членць Петр Тултаев и Мордовиянь Правительствать Председателенц васенце заместителец Галина Лотванова.
Мордовия Республикань Оцюнять пресс-службац