«ЭМ-КАБЕЛЬ» заводса нолдаф тевс эрь-кодама модификациянь кабелень производствать коряс цех, оцю васта тяса занци импортонь полафты продукциясь. Тяконь лувксса тяса нолявихть телекоммуникационнай оборудованиянди кабельхть. Тяниень пингть санкционнай политикать сюнеда синь ащихть фкя и тяка альтернативакс питаниянь источникненди базовай станциятнень подключандаманкса. Продукциясь лац няфтезе прянц и пачфневи ведущай российскяй телекоммуникационнай станциятненди. Од площадкать лангса панжеви 50-да лама од рабочай васта.
Омбоце проектсь ётафтф эряфс «ЭМ-КАТ» предприятияса, коса ладяф од технологияс коре литейнай производства. Площадкать производственнай возможностенза лезнихть пяшкодемс эрь-кодама отраслятнень эса вешфксть — тя машина кинь транспортсь и метрополитенонь подвижной состафне, автокомпоненттне, велень хозяйствань техникась, запорнай арматурась, энергетикась и ламось лиясь.
Од цехть мощностец — колма тёжятть тонна литья кизоти. Ули панчф пцтай 200 од рабочай васта (тячиень шити примаф ни 49 ломань).
Кафцьке проекттне ётафтфт эряфс Промышленностть виияфнеманц коряс фондть ширень кирдеманц вельде.
Мордовиянь Оцюнясь Артём Здунов макссь оцю оценка «Оптикэнерго» компаниятнень группаснон эса производственнай од площадкатнень панжемаснонды. «Сембода главнайсь, што пяшкотькшневихть производственнай платтне и оборудованиянь рамамать коряс платтне ся пингть, мзярда международнай обстановкась аф фалу лезни тиемс тянь. Тя пяк важна, - мярьгсь сон. - Станокнень и оборудованиять оцюшка пялькссна — российскяй производстваннет, сон мезьсовок аф сяда кальдяв. Пяк важнай проектсь — литьять коряс, работась мольфтеви московскяй метрополитентть мархта , улихть закаст. Но, конешна, эряви ламода сяда келептемс КАМАЗ-ть мархта сотрудничендамать. Главнайсь — што производствась виияфневи, стройсевихть од цехт, эвондакшнихт цебярь зарплата мархта рабочай вастт, пяшкотькшневихть Россиянь Президентть поручениянза».
«Оптикэнерго» ГК-нь директоронь советть председателец Эвир Боксимер китькстазе: «Тейнек важна — аф васькафтомс ломаттнень надиямаснон: аф трудонь условиятнень, аф заработнай платать мархта. Мялезе азомс спасибамань валхт Артём Алексеевиченди — минь фалу пшкятькшнетяма теенза кизефкс мархта, конат минь пичефтьсамазь, и най мушенттама ширень кирдема. Сюкпря кить инкса, кона тяса строяф, электрическяй подстанциять подключандамаса лезксонкса. Минь няйсаськ, што маласонк улихть ломатть, конат фалу лездыхть, конатнень ули мяльсна виияфнемс республикать.
Мордовия Республикань Оцюнять пресс-службац