Мордовиянь медиконь очередной командась мрдась Херсонскяй областень Каланчакскяй округста, коса синь макссесть эрявикс медицинскяй лезкс тостонь эряйхненди. Тячи врачнень мархта, конат пцтай кафта кофт пяшкотькшнезь эсь долгснон республикати подшефнай территорияса, васетькшнесь Мордовиянь Оцюнясь Артём Здунов.
Лятфтасаськ, што Мордовиять и Каланчакскяй округть ёткса подписандаф марстонь тевонь вятемать колга соглашения. Каланчаку республикань медработникнень васенце командировкасна ётафтовсь кизоть ушетксста. Целайнек кизоньберьф Мордовиянь врачне и медсестратне фалу улендихть од региоттнень эса военнослужащайхненди и гражданскяй населенияти медицинскяй лезксонь максоманкса.
«Кенярдян, што сембе тинь мрдаде шумбраста-тазаста. Мялезе спасибамс теенть мес примасть тя вызовть, - приветствовандазень медикнень Артём Здунов. - Содаса, што ламотне эздонтт аф васенцеда ульсть командировкаса, кой-кит несколькаксть ни якасть лезнема од территориятненди. Арьсян, ломаттне азондыхть теенть благодарностень валхт. Азондость, кодама тоса инфраструктурась, ломаттнень настроениясна, мезть лангс тейнек эряви шарфтомс мяль».
Мордовскяй республиканскяй клиническяй больницянь врачсь-хирургсь Алексей Дерябин азозе, што Каланчакса работамстост лезкс получасть 10 тёжятть эряйсь — тя терапевтическяй, неврологическяй, хирургическяй лезкс, вакцинация. Ётафтф пцтай 350 аф фкя лацонь оперативнай вмешательства.
«Целайнек командировкась кадсь пара мяльхть-арьсемат. Колсесь мяль аньцек ся, што тоса эряй ломаттне ашесть получсе цебярь медицинскяй лезкс 6-7 киза. Кальдявста ащесть тефне вакцинациять мархта — шабатнень ашельхть ламоц стандартнай прививкасна. Но минь команданьке работась сиземань апак содак, лама удалась тиемс», - пачфтезе Алексей Дерябин.
1№ идень поликлиникань врачсь-педиатрсь Светлана Измайлова азозе, што работамс сашендовсь ваймама шифтома, ветемба, сяс мес медицинскяй работникне тоса пяк аф сатнихть. «Шабатнень мзолфкасна и кайги рахсемасна, тядятнень-алятнень спасибамасна — вов мезсь лезнесь тейнек работамс тяфтама режимса. Любой кизефксть тоса удалсесь решандамс республиканьконь ширень кирдеманц вельде», - мярьгсь сон.
Мордовиянь специалисттнень валснон коряс, Каланчакса больницясь кота кизот работась анестезиологфтома-реаниматологфтома. Пациенттне ащесть пяк стакаста. Интенсивнай терапиянь палатаса ащихнень кулсесть пцтай сембе, Мордовиянь медикненди удалась ламода полафтомс ситуациять. Пуроптфт лекарственнай препаратонь запаст, ётафтф вакцинация.
«Минь работаме экстремальнай условияса, операциятнень сашендовсь тиендемс простой палатаса, специализированнай световой оборудованиять вастс нолямс тевс телефоттнень», - азозе Мордовскяй республиканскяй клиническяй больницянь врачсь-реаниматологсь Оксана Руженкова.
Стане жа медикне азозь, што Каланчаконь шабатнень мяльс пяк тусь «Лесная сказка» Саранскяень санаториясь, коса синь ваймосесть тяддень август ковста. Старшай классонь кой-кона тонафнихне нльне азсть мяль поступамс тонафнема Мордовиянь вусненди.
Васедемать шумордамста Артём Здунов казезень врачнень Мордовия Республикань Оцюнять благодарностенц мархта.