Андрей Каприн азозе, што «Онкопатруль» проектти, кона работась республикаса 4 декабрьста сявомок 8 декабрти молемс, максфоль сембе ширдень лезкс. Онкологическяй службась регионца пяк вии — тяниень пингонь аппаратура, европейскяй уровенень операционнайхть, цебярьдонга цебярь реанимацият», - мярьгсь сон.
2019 кизоста сявомок странаса ётафневи эряфс «Борьба с онкологическими заболеваниями» федеральнай проектсь. Тя пингста Мордовиянь онкослужбась тись аськолкст инголи: омбоце кизось ни Саранскяйса работай республиканскяй онкодиспансерть од поликлиникац, рамаф медицинскяй оборудованиянь сядода лама единица, тевс сувафневихть диагностикань и пчкафнемань од методикат. Саранскяйса и райцентратнень эса тифт онкологическяй лезксонь амбулаторият. Злокачественнай таргозьфнень ранняй стадияса мушендомаснон показателец кассь 6,1 процентта.
Артём Здунов шарфтсь мяль профилактикать эрявиксшинц лангс. «Минь путнетяма сатомшка лама вийда скринингонь мероприятиятнень, массовай диспансеризациять ётафнеманкса. Урмать ранняй стадияса мушендомац аралакшни ломанень эряфт».
Сон стане жа китькстазе, што Мордовиясь работай сянь коряс, штоба одкстоптомс онкологическяй диспасерть зданиянц: аноклаф проектно-сметнай документациясь, ётафтф госэкспертиза республикась надияй федеральнай центрать ширень кирдеманц лангс.
Мордовия Республикань Оцюнять пресс-службац