Круглай шрать заседанияц ётафтовсь «Артек» идень лагерьса. Мордовиянь Оцюнясь поладсь важнай темать корхтафтоманцты Москуса видеосвязть коряс.
Лятфтасаськ, кизоть ушедомста 17 тёжяньда лама российскяй школась и идень 7 тёжяньда лама садсь примасть участия партийнай проектть акциянзон эса. Региоттнень эзда вете лидерхнень ётксот — Мордовия Республикась, Ставропольскяй и Красноярскяй крайхне, Саратовскяй и Растовскяй областтне. А сембода лама участникта пуроптсь «Здоровое питание в школе и дома» акциясь.
Школьникнень — акциянь сяськихнень казезь «Артеку» путевкаса. Республиканьконь делегацияц арась инь оцюкс российскяй региоттнень ёткста — 41 ломань.
Артём Здунов участникнень приветствовандамста лятфтась традиционнай российскяй духовно-нравственнай питнишитнень аралакшнемаснон колга странань Президентть указонц колга и азондсь республикать инициативанзон квалма «Мир возможностей» проектть мяльса кирдезь. Фкясь эздост - «Артек — самая длинная смена» фильмать тиемац, кона лемтьф Великай Отечественнай войнать ушедоманцты и лагерть эвакуациянцты.
Стане жа Артём Здунов отмечазе школьникнень шумбра ярхцамбяльса андомаснон коряс проектть важнайшинц. «Минь ётафнесаськ сонь эряфс Государственнай Советть вельде, пяк серьёзнайста шаштоме инголи — работатама аф аньцек странаньконь региононзон мархта, но и Таджикистанца, Арменияса и лия странатнень эса. Тя проектсь тейнек пяк важнай, сяс мес шабатнень шумбрашисна — политиканьконь приоритетоц», - китькстазе республикань Оцюнясь.
«Артек» МДЦ-ть тематическяй сменанц рамкаса ётафтовсь проектнай сессия, конань эса Мордовияста инициативнай группась няфтезь эсь работаснон «Традиции здорового питания» акциять коряс.
Круглай шраса шумбра питаниять коряс преложениятнень колга азондсь Ичалковскяй райононь Оброченскяй школаста Вячеслав Абрамов.
Мордовиять активностенц мяльс сявозь «Мир возможностей» проектть координаторонза азсть мяль нолдамс тевс федеральнай од акциятнень эзда фкять именна минь республикасонк.
Мордовия Республикань Оцюнять пресс-службац