Артём Здунов сюконясь Сергей Чирковонди сембе ширде регионти лезксонь максоманкса и тяшкстазе оцю сотксонь уровенть республикань Правительствать и Социальнай фондть ёткса. Мзярда стясь кизефкссь Саранскяйса клиентскяй службаса ломаттнень примамаснон коряс цебярь условиянь тиемаса, Правительствась лиссь иницаторкс од зданиянь строямаса. Курокста примафоль решениясь мода вастонь максомать коряс, ванфтольхть сембе кизефксне строямать мольфтеманц коряс.
Стане жа Мордовиясь кирдезе Россиянь Социальнай фондть проектонц сире поколениянь корхнема Центрань тиемаса. Тячи Мордовияса панчф 17 тяфтама Центрада, пцтай эрь районца. «Центратне туфт мяльс сиянь пингонь ломаттненди. Синь тоса корхнихть, марясазь пряснон эсь вастсост. Монць улендян тоса и кульсян ня центратнень колга аньцек пара валхт», - азозе республикань Оцюнясь.
Сергей Чирков лемдезе Мордовия Республикать коряс Российскя Федерациянь социальнай страхованиянь и пенсионнай Фондть Отделениянц странаса инь цебярьхнень ёткста фкакс. «Тя сатфкссь сатовсь Отделениянь коллективть работанц и республиканскяй властть лезксонц максоманц вельде», - китькстазе сон.
Васедемаса корхтасть республикать участиянц колга Социальнай фондть пилотнай проектсонза, а стане жа строительствать и Мордовия Республикать коряс СФР-нь Отделениять клиентскяй службанц лац-ряц петеманц коряс кизефксне.
Мордовия Республикань Оцюнять пресс-службац