Атяшеваса «Старт» спортивно-тренировочнай центраса Дмитрий Патрушев ванозе оцю уендемань бассейнать.
Лямбирскяй райононь Оцю Елховка велеса ётай кизоть педа пес тисть мзярошка социальнай объект. Тястонь идень садсь ульсь путф нинге 1981 кизоня велень прявкс промышленнай предприятиять – «Октябрьская» Агрофирмать лезксонц вельде. Объектти макстть омба эряф – тяни тя тяниень пингонь идень сад и потмоса и лангса.
Федеральнай ведомствань руководительти азондозь, што зданияса 11 группа, 240 иденди. Пцтай 110 млн цалковай лангс ётафтфт строительна-монтажнай покодемат, полафтфт инженернай коммуникациятне, рамафт кухнянди, музыкальнай и спортивнай залонди, медблоконди од оборудования и лия паршихть – федеральнай, республикань, муниципальнай бюджетонь ярмакть лангс, а тяфта жа «Октябрьская» Агрофирмать лезксонц вельде. Сембось, мезе вешихть тяниень пингонь образовательнай стандарттне.
Тяфта жа детсадсь получась федеральнай уровенень инновационнай площадкань статус СТЕМ-образование дошкольников технологиять коряс – программась сувафни эсь эзонза емластокиге профориентациянь ётафтомать и эрь кодама маштомань касфтома-виияфтома. Творчестваса иттне и воспитательхне занимандайхть театрализациянь и музицированиянь центраса, а тяфтамка утренникне тяса ётнихть оцю сцена лангса профессиональнай валдса и звукса. Идень группатне валдтт, цебярьхть, мазыхть, обстановкась ялгань.
Оцю Елховкань сембе кизонь эряйхнень культурнай эряфсна пяк аф фкя лацонь – тяса ули хор, народнай ансамбль, гончарнай мастерской – марнек 24 клуб и эрь кодама кочкафкс. Сембе синь ащихть тястонь культурань кудса.
Велень клубсь тяфта жа одкстомсь етай кизоть. Ремонтировандафт помещениянь сембе зданиятне – ваныень залсь 270 вастс, музыкальнай гостиннайсь, хореографиянь залсь, ламафункциональнай репетиционнай и спортивнай залхне, кружоконь комнататне. «Местный дом культуры» проектть вельде рамаф од оборудования гончарнай мастерскойти – сон покоди 2019 кизоста сявомок.
«Агрофирмась – Мордовиянь экономикать вии лафтувоц, - мярьгсь Артём Здунов. - Предприятиять производстань базац цебярьдонга-цебярь уровеньца, фалу моли экономикань ширде касома и вии технологическяй касфтома-виияфтома. Прявкссь – компаниясь арьси ломаттнень колга и вяти лама емла тевонь политикать эса».
Мордовия Республикань Оцюнять пресс-службац