18 майста ульсь Мордовия Республикань Оцюнять нюрьхкяня пингс тевонзон тиендиснон Владимир Волковонь МР-ть эзга природопользованиянь сфераса надзорть коряс Федеральнай Службань Управлениять од вятиенц Андрей Аленцинонь мархта рабочай васедемац. Од вятить республикань лидерти представляндазь Росприроднадзоронь тефнень и госслужбань Управлениять начальникоц Тимур Ахунянов и ПФО-ть эзга Росприроднадзоронь Департаментть начальникоц Олег Кручинин.
Андрей Аленцин шачсь Саранскяйса, аделазе Н.П.Огаревонь лемса МГУ-ть, 1990-1991 кизотнень ульсь Мордовскяй госуниверситетонь ВЛКСМ-нь комитетть секретарькс и 25 кизода ламос работась Госбезопасностень оргаттнень эса. 2017 кизонь 18 майста сявомок РФ-нь природнай ресурсонь и экологиянь министрть приказонц мархта азф Мордовия Республикать эзга природопользованиянь сфераса надзорть коряс Федеральнай службань Управлениять вятикс.
Тимур Ахунянов, представляндамок МР-ть эзга Росприроднадзоронь Управлениять од вятиенц, отмечазе, што Андрей Аленцин – республикаса шачф-касф ломань, сонь оцю опытоц государственнай структуратнень эса работамаса, лама содай регионца тячиень тефнень колга, тяконь лувксса природоохраннай сфераса. Стане жа отмечафоль, што Мордовияса Росприроднадзорть работац мольфтеви стабильнайста, структурать кемот сотксонза региононь руководствать мархта, сон сатни аф кальдяв сатфкст етафневи природоохраннай мероприятиятнень коряс.
Владимир Волков мярьгсь, што Андрей Аленцинонь мархта теенза сашендовсь мольфтемс марстонь работа университетса и тяда мельдень кизотненьга, лемдезе сонь добросовестнай работникокс. Стане жа Владимир Волков китькстазе, што экологиянь кизефксне республикаса кирдевихть башка контроль ала: «2017 кизось Россиянь Президентть Владимир Путинонь мархта азф Экологиянь кизокс. Мордовияса экологиянь кизефксненди фалу шарфневсь и шарфневи оцю мяль.
Васедемань участникне азсть анокши работамс фкя-фкянь мархта кеме сотксонь кирнезь, обеспечендакшнемок Мордовиянь эряйхнень экологическяй безопасностьснон и ванфнемок регионть природнай козяшинзон.
Мордовия Республикань Оцюнять Пресс-службац