21 сентябрьста илять тя мероприятиянь участникне пуромкшнесть «Солнечная Мордовия» лагери, коса ётафтовсь вожатскяй сообществати традиционнай ритуалсь — илядень штатолсь. Тя пингть тол марть ваксса корхтафнесазь ётаф шинь важнай кизефкснень. Вожатскяй штатолс сашендсь и Мордовиянь Оцюнясь Артём Здунов. Стане жа корхнемаса примасть участия вице-премьерсь Галина Лотванова, Од ломаттнень тевснон коряс Госкомитетть председателец Анастасия Гришнёва, Саранскяй и Мордовскяй митрополитсь Зиновий, М.Е.Евсевьевонь лемса МГПУ-ть ректороц Марина Антонова. Корхтамась мольфтевсь личностть воспитандамаса вожатскяй движениять вастонц колга. Сембе састь марстонь мяльс, што тя уникальнай среда, кона эряви ванфтомс.
«Койхнень-обуцятнень, конат путфт тя движенияти, минь ванфнесаськ, тя пяк важна», - китькстазе Артём Здунов.
Вожатайсь — тя наставник шабатненди, вожатствась и педагогическяй отряттне — од ломанень политикать и образованиять важнай пялькссна. Кизонь фкя сменаста вожатайти ули кода лездомс кочкамс шабати эряфса виде кит-ятт, арамс ялгакс, кепотьксокс — совестень, виень, справедливостень и патриотизмань примеркс.
Эрь кизоня студенческяй отряттне макссихть возможность тёжятть од ломанти мумс вастснон профессияса, творчестваса, волонтёрскяй тевса.
Тядде аньцек Мордовиять эзда кафта тёжяньда лама студентсь педагогическяй отряттнень лувксса трудендасть республикань и эздонза ширеса ащи идень лагерьхнень эса. Республикась кирнесы педагогическяй отряттнень виияфнемаснон ширенц. Меля «Профессиянь и маштомошинь виияфнемань агентствать» компетенциянзон лувксс сувафтовсь од компетенция - «Важатскяй тевсь».
Лятфтасаськ, што «Од профессионалхт» национальнай чемпионатть финалсонза, кона ётафтовсь Саранскяйса, сон лац няфтьфоль. Эста и эвондась мяльсь ётафтомс регионцонк вожатскяй мастерствать коряс панжада васенце чемпионатть.
Мордовиянь Оцюнясь китькстазе: вожатскяй движениясь — тя республикать гордостец. «Тя чемпионатсь миньцонк васенцесь. Катк сон кармай аф мекольцекс!» - мярьгсь сон.
Мордовия Республикань Оцюнять пресс-службац