Артём Здунов премьерть мархта корхнемста азозе, што республикаса шарфневи мяль аф аньцек оцю агрохолдинкненди, но и хозяйствованиянь ёмла форматрненди, конатнень продукциясна стане жа няфтьф Мордовиять стендонц лангса. Михаил Мишустинонь кизефксонзон лангс отвечамста, Мордовиянь Оцюнясь пачфтезе, кода регионць кирнесы фермерхнень ширеснон, и няфтезе фермерскяй хозяйстватнень продукцияснон. Кой-конатнень эздост ули кода лувомс уникальнайкс. Кепотьксонди, африканскяй клариевай сомть максонц эзда паштетть, камамбер ремесленнай сырть, мордовскяй сидорть и ламоть лиять.
Мордовияса мекольдень колма кизотнень активнайста виияфневи сельхозкооперациясь.
Мордовия Республикать стендонц стане жа ванозь вице-премьерсь Виктория Абрамченко и странань велень хозяйствань министрсь Дмитрий Патрушев.
«Минь тиеме оцю аськолкс сельхозкооперациять виияфнемаса, - мярьгсь Артём Здунов. - Келепневихть рынкатне Москуса, Нижняй Новгородса. Кда корхтамс органическяй продукциять колга — тяса рынкась ёфси аф фатяви: тя аф аньцек Родинаньконь столицац, но и арабскяй странатне».
Мордовия Республикань Оцюнять пресс-службац