Концертсь сашендсть военнослужащайхне, мужественнай ломаттне, соотечественниконке, земляконьке, конат примасть участия Родинаньконь интересонзон араламанкса специальнай военнай операцияса. Воиттне, конат ётазь войнань толу-качаму китнень, ашезь юмафта цебярьс надиямаснон и пара мяльса цяпасть артисттненди.
Мордовиянь Оцюнять лемста приветствия мархта пуромфненди пшкядсь РФ-нь Президентть видеса МР-ть Полномочнай представителец Светлана Федонина. Сон спасибась госпиталень медицинскяй персоналти, мес синь водендакшнесазь вийснон боецнень шумбрашиснон мрдафнеманцты, конат листть Родинать аралама и, эсь прянь аф ужяльдезь, мольсть врагть каршес, пяшкотькшнемок странать мархта путф задачатнень. «Арьсян теенть сяда курокста пчкамс и мрдамс куду, эсь семьнтенди, радня и мала ломанентенди!» - мярьгсь сон.
СВО-нь участникнень инголе выступандасть «САДко» содаф группась, конань солистонзон ёткста фкясь, Мордовия Республикань Заслуженнай артистсь Александр Бардин, шачсь Краснослободскяй районца. Концертть поладозь шансоньесь Гриша Петров и регионцтонк «Эх, мордовочка» народнай коллективсь. Стане жа военнослужащайхненди Великай Отечественнай войнать колга морот морась Россиянь Народнай артистсь Бедрос Киркоров.
Сельмос пови мокшень и эрзянь щапне, лама вайгяльса морамась, седиста моли лямбе валхне — сембось тя ульсь концертнай программаньберьф. Илань аноклайхне-ётафтыхне макссть военнослужащайхненди казнет. Тяда башка, боецненди ульсь кода корхнемс артисттнень мархта чайда симомста.
Эряви азомс, мяльть ётафтомс Москувонь госпитальса тя мероприятиять землячествань активисттненди азозе Ковылкинскяй райононь содаф гармонистсь Владимир М. Ётай сёксеня сон тертьфоль мобилизацияс коре Родинать аралама, а тяни пчкси медицинскяй тя учрежденияса.