«Огарев Аренаса» «Действуй» фестивальсь кочказень инжихнень лама интерактивнай площадкава, творческяй мастерскойге, конат дивандафнезь ванфснон, а главнайсь – марстоптозь фестивальть участниконзон, штоба синь аральхть пара ялгакс и цебярь партнеркс.
Эсь видеообращениянц тя оцю илать участниконзонды кучезе Россиянь Президентсь Владимир Путин, сон арьсесь од ломаттненди фалу сатнемс путф цельснон сембе тевснон эса.
Мордовиянь Оцюнясь Артём Здунов, инжихнень шумбракстозь китькстазе, што Сембе масторонь од ломанень фестивальсь ётафтови сюконямок Россиянь Президентти, и сюконясь омба масторонь сембе представительхненди тя оцю ялгаксшинь илать эса участиянкса. «Фестивальсь аделави - а минь сотрудничестваньке аньцек ушеткши, и сон кармай касома-виияма сяда тов, - мярьгсь республикать руководителец. - Минь содафттядязь минь койнеконь-обуцянеконь, культуранеконь мархта. Мордовиясь - Оцю Россиять эряви пяльксоц, а Российскяй Федерациясь – тя ладямать, согласиять и справедливостть оплотоц!»
Артём Здунов китькстазе: Мордовиясь – лама национальностень, ялганькельги республика, коса ладязь эряйхть 90 национальностень ломань. Регионтть руководителец арьсесь, штоба «Действуй» фестивальсь араль сембе участникненди од сяськоманди ушексокс и сатфксокс.
Италияста инжись Пьетро Страмецци, фестивальть панжемста мярьгсь: «Сяда меле, кода мон ушедонь Россиять историянц, коензон-обуцянзон тонафнема, Достоевскяень лувондома, мон шарьхкодень: монь ваймозе рузонь, и седизе - Россиять мархта. Тя фестивальсь няфтезе, што Масторти ашезь удала юмафтомс, селгомс Россия-Матушкать. Тазалмась марстоптомаса, ладямаса и кельгомаса! Кенярдеда, што ули кода лемдемс эсь прянттень рузокс!»
Мордовия Республикань Оцюнять пресс-службанц