Вержиста, 16 майста, Саранскяи рабочай визит мархта сашендсь РФ-нь Правительствать Председателенц заместителенц тевонзон тиендисна Ольга Голодец. Мордовия Республикань Оцюнять Владимир Волковонь мархта вице-премьерть тевонзон тиендисна ванозень ламоц социальнай объекттнень, конат сотфт Саранскяйса футболть коряс миронь чемпионатонь матчнень етафтомаснон мархта, а стане жа ульсь «Мордовия Арена» стадионца етафтф тестовай колмоце матчса.
Самста Ольга Голодец ванозе аэропортовай комплексть, кона панжевсь оцю реконструкцияда меле. Лятфтасаськ, аэропортовай комплексть одкстоптомста строяфт кафта терминалхт – внутренняй и международнай воздушнай линиянди, етафтфт работат взлетно-посадочнай полосать реконструкциянц коряс, строяфт од рулежнай кинят, келептьф перронць. Тяни Саранскяень аэропортти ули кода примсемс оцю воздушнай суднатка. Ольга Голодец отмечазе, што тяниень пингонь од аэропортть оцю значенияц республикать сяда товолдонь касондоманкса-вииякшнеманкса.
Стане вице-премьерть тевонзон тиендисна ванозе футболть коряс миронь чемпионатти строяф фкя тренировочнай площадкать, кона ащи «Старт» стадионца, а стане жа содафтсь Спортонь воднай видонь дворецть работанц мархта. Объктсь отвечай сембе ся вешфксненди, конат лихневихть уендемать
коряс международняй пялькстомань примамати. Ольга Голодец шарфтсь мяль сянди, што Дворецть строямста тевс нолдафтольхть тяниень пингонь и высокотехнологичнай материалхне.
Сяда тов РФ-нь Правительствать Председателенц заместителенц тевонзон тиендисна ванозе Мордовскяй республиканскяй клиническяй больницять, кона мундиальть пингста Саранскяйса арай ФИФА-ть уполномоченнай больницякс. Отмечафоль, што Чемпионатть етафтомста «Мордовия Арена» стадионть видеса 17 апрельста сявомок панчфоль Республиканскяй клиническяй больницять отделенияц спортивнай пялькстомань участникненди и мероприятиянь ваныхненди медицинскяй лезксонь максоманкса. Отделенияти сувсихть стадионть и болельщиконь фестивальть медпунктсна, а стане жа стадиононь и болельщиконь фестивалень мобильнай бригадатне.
Стане жа Ольга Голодец ульсь футболть коряс Панамань сборнай командать тренировочнай базасонза, кона мундиалень шитнень кармай улема Саранскяйса Олимпийскяй резервань спортивнай школать видеса. Ванфтольхть тренировочнай площадкатне, Панамань сборнаень члеттненди эрямань номерхне, вельхкс ала футбольнай манежсь.
Тяка шиня Ольга Голодец макссь оценка Four Points bi Sheraton вете тяштень гостиницать, кона строяф Саранскяйса футболть коряс миронь чемпионатти ФИФА-нь клиентскяй группатненди, ванозе С.Д.Эрьзянь лемса изобразительнай искусствань Мордовскяй республиканскяй музеень экспозициятнень, а стане жа Тысячелетиянь площадть.
Тестовай матчть ушедомда инголе Ольга Голодец содафтсь «Мордовия Арена» стадионть инфраструктуранц мархта, етафтсь совещания республикать мировой футбольнай первенствати анокламанц коряс. РФ-нь Правительствать Председателенц заместителенц тевонзон тиендисна отмечазе Мордовиять чемпионатти лац анокламанц. А меле Ольга Голодец приветствондазень ваныхнень, конат састь «Мордовия» и «Сызрань-2003» футбольнай клупнень налхкомаснон ванома.
Мордовия Республикань Оцюнять пресс-службац