16 майста «Мордовия Арена» стадионца, кона ефси аф кунара панжезень эсь кенкшензон, етась тестовай колмоце матчсь, кона арась генеральнай репетициякс футболть коряс Миронь чемпионатонь матчнень карша. Налхкомать ванома пуромкшнесь 41057 ломань, мезть мархта ладяфоль рекорд Профессиональнай футбольнай лигать ванома самаса.
Тестовай колмоце матчть пингста паксять лангс лисендсть Профессиональнай футбольнай лигань «Мордовия» и «Сызрань-2003» командатне.
Матчть ванома сашендсь аф кржа оцю инжи, конатнень етксольхть Российскяй Федерациянь Правительствать Председателенц заместителенц тевонзон тиендисна О.Ю.Голодец и Мордовия Республикань Оцюнясь В.Д.Волков.
—Етаф кувака ки, и тячи минь панчтама 12 мазыдонга мазы стадион сембе странать келес,—мярьгсь О.Ю.Голодец.—Минь надиятама, што нят
кармайхть аф аньцек стадиотт, тя кармай аськолкс российскяй футболть и российскяй спортть од историязонза.
Тяда меле футбольнай командатнень и сембе пуромфнень привествовандазень республикань Оцюнясь В.Д.Волков. Владимир Дмитриевич азсь благодарностень валхт странань руководствати.
—Россиянь Президентть В.В.Путинонь решениянц коряс Саранскяйсь примасы футболть коряс Миронь чемпионатть, сонь решениянц вельде миньцонк эвондась тя мазыдонга мазы стадионць и сядот лия объектсь. Мезенкса минь теенза седишкада спасибатама»,—мярьгсь республикань вятись.
Тяда башка, В.Д.Волков благодарностень валхт азсь РФ-нь Правительствати, строительхненди и республикань сембе эряйхненди, кит примасть участия футболть коряс Миронь чемпионатти анокламаса.
Матчть ушедомда инголе журналисттнень мархта васетькшнесть МР-нь Правительствать Председателенц заместителец—целевой программань министрсь А.Н.Меркушкин и «Динамо» футбольнай клубонь нападающайсь, Саранскяйть кода Россияса 2018 кизонь Миронь чемпионатонь ошть-организаторть посолоц Кирилл Панченко.
А.Н.Меркушкин азозе, што тестовай колмоце матчсь «Мордовия Арена» стадионца етафтови пяк малакс сянди, кода етафтовихть футболть коряс Миронь чемпионатонь матчне. Кода стадионца, стане и ошса работась лама аф фкя лацонь служба, волонтерхт. Стане жа азфоль, што тестовай колмоце матчти машфтольхть сембе ся афсатыксне, конат лихтьфтольхть васенце кафта налхкоматнень етафтомста.
«Мордовия» командась пяшкодезень болельщиконзон учендемаснон, сяськомок Самарскяй областень «Сызрань-2003» футбольнай командать 1:0 счетса. Фкя и тяка голть 14-це минутать лангса шавозе Руслан Мухаметшин. Сяськомась панчсь миннетненди ки Футбольнай национальнай лигав.
Тестовай матчне шумордафт. Инголе футболть коряс Миронь чемпионатсь. Надиятама, мировой первенствань матчне Саранскяйса, васенцесь конатнень эзда кармай ни 16 июньцта, етайхть лац.