19 июньцта «Мордовия Арена» стадионца етась Россияса 2018 кизонь FIFA-нь футболть коряс Миронь чемпионатонь омбоце матчсь, конань эса васетькшнесть Колумбиянь и Япониянь сборнайхне.
Матчса ульсь FIFA-нь Президентсь Джанни Инфантино. Оцю инжить васьфтезе Мордовиянь Оцюнясь Владимир Волков. Республикань вятить мархта корхнемста FIFA-нь Президентсь макссь оцю оценка мировой
футбольнай первенствати регионть анокшинцты, отмечамок, што Саранскяйсь – пяк ару ош.
Владимир Волков: «Аэропортста стадиону пачкодемста минь етафтоме инжити аф оцю экскурсия: няфтеськ «Тавла» тяниень пингонь микрорайононьконь, ошть историческяй центранц од зданиятнень, Оперань и балетонь театрать, Тысячелетиянь площадть, фонтаттнень мархта, а стане жа стадионть маласта од набережнайть».
«Няеви, што тя сембось тифоль аф фкя шиста и тяса трудендась Мордовиянь лама ломань», - макссь оценка няйфти Джанни Инфантино.
Стане жа Колумбия-Япония матчть ванома сашендсть Япониянь Принцессась Хисако Такамадо, «Россия-2018» Оргкомитетть председателец Аркадий Дворкович, «Россия-2018» Оргкомитетть генеральнай директороц Алексей Сорокин.
Омбоце матчса «Мордовия Аренаса» ульсь 40 842 ломань.
Мордовия Республикань Оцюнять пресс-службац