24 мартста Государственнай русскяй драматическяй театраса етась торжественнай собрания, кона лемтьфоль Российскяй Федерациянь национальнай Гвардиянь войскатнень шиснонды. Мероприятияса участия примась Мордовиянь Оцюнясь Владимир Волков.
Заседаниясь ушедсь минута кашт аф молезь ащемаста. Тяда инголе Чечняса шавфоль земляконьке, Саранскяень эряйсь, внутренняй войскань сержантсь Анатолий Ермолаев. Седиень ацергофты тя случайсь тага весть няфнесы кодама эрявикс и тяка пингть пелькс Росгвардиять службац, конань боецонза арсихть мекольце перяфксокс международнай террорть каршеса.
Росгвардиянь служайхнень инголе выступандамста Мордовиянь Оцюнясь Владимир Волков мярьгсь:
- Мордовия Республикать эзга Росгвардиянь отделонь уважаемай служащайхть!
Тячи минь чествондасаськ сятнень, кинь эрь шисна мала подвикти. Сятнень, кие фалу вернай присягати и «служай законти», смелста стяшенды преступникнень инголе, ванфнесы граждананьконь эряфснон и сетьмошиснон.
Седи ваксста похдравляндатядязь тинь и коллегантень РФ-нь национальнай гвардиянь шить мархта!
Меля странать правоохранительнай структурасонза тифоль оцю реорганизация: внутренняй войскатне лемтьфт Росгвардиякс.
Главнайсь, што тя полафтксне ашезь кирьфта пяшкотькшневи работать эффективностенц. Сяс тячи минь отмечасаськ инь «од» силовой структурать од иланц.
Мордовия Республикаса Росгвардиять отделсонза работайхть профессиональнай сотрудникт, конат етасть серьезнай специальнай подготовка, козя боевой опытсна, теест вийс коре решандакшнемс инь стака и ответственнай задачатнень.
Мялезе поздравляндамс работантень ушедоманц мархта и азомс благодарностень валхт путф задачатнень совестьс коре пяшкотькшнеманкса.
Службанте стака и пелькс. Кода содасасть, тячи Чечняса боевикнень атакаснон пингста шавфтольхть национальнай гвардиянь 6 военнослужащайхне. Етксост Саранскяень церась Анатолий Владимирович Ермолаев.
Тя стака юмафкс сембонди тейнек. Минь мзярдовок аф юкстасаськ цератнень, конат эсь эряфонь аф ужяльдезь стясть странать безопасностенц ванфтоманкса.
Сембе пингонь мяляфтома сембонди, кие шавф, педа-пес пяшкодемок Родинать ингольде эсь долгонц!
Эняльдян лятфтамс синь минута кашт аф молезь ащезь.
Мордовиясь тячи лувондови странань фкя инь безопаснай регионкс. Преступностть уровенец республикаса, кода и мекольдень несколька кизотнень, лядонды фкя инь емлакс Россияса (тяни сон 30 процентта сяда емла целайнек странать эзга показательхнень коряс).
Меля Мордовияса Росгвардиянь спецподразделениянь сотрудникнень мархта обеспечендафоль 280 лама специальнай мероприятия, конатнень пингста киртьфоль пцтай 60 ломань.
Вневедомственнай охранань наряттнень мархта оратф 200 преступления. Аф законнай оборотста сявф 150 единица оружия, аф кржа наркотическяй вещества.
Минь пяк надиятама, што маластонь пингть вневедомственнай охранась мрдафтсыне тяда ингольдень позициянзон. Тячи подразделениянтень араламанц ала ащи 5 тежяньда лама аф фкя лацонь объектсь.
Оцю работа вяти лицензионно-разрешительнай службась. Тяниень пингть республикаса регистрировандаф оружиянь 19 тежянь канни. Етай кизоть сембонь синь проверязь подразделениянь сотрудникне. Аф фкя лацонь нарушениятнень сюнеда сявфоль оружиянь колма тежяньда лама единица.
Фкя пингста Росгвардиянь сотрудникнень инголе путневи лама стака задача. Аф ваномок илать лангс, китькстасаськ кой-кона пичефти кизефкснень.
Васенцесь, общественнай порядкать обеспечендамац. Статистикать коряс общественнай вастса тиендеви эрь колмоце преступлениясь (29 процентсна), а синь марстонь лувкссна касы.
Тяфтама ситуациясь эвондафни таколдомат, граждаттнень ширде – претензият. Тейнек аш кода нолдамс етай пингти мрдамать. Ошень и велень ульцяса, куд пирьфнень и подъезттнень эса ломаттне должетт марямс пряснон безопасностьса. Тяса активнайста нолнемат тевс техническяй средстватне, Росгвардияти вятема марстонь работа МВД-ть мархта.
Национальнай гвардиять инголе путневи задачатнень еткса васенце вастса ащи терроризмать и экстремизмать каршес тюремась. Марса тейнек эряви селгомс республикать территориянц боевикнень и террористическяй организациянь вербовщикнень эзда, оперативнайста мушендомс сятнень, кие сотф террористическяй тефнень мархта, тяконь лувксса и омба масторса.
Башка мяль шарфтома 2018 кизонь футболть коряс миронь чемпионатти строяви объекттнень, сембе социальнай объекттнень, транспортть и конешна лама ломанень пуропни мероприятиятнень антитеррористическяй аралафшиснонды. Мялезе азомс благодарностень валхт сембе пуромфненди тяфтама мероприятиятнень пуроптомаснонды и етафтомаснонды оцю путксонь путнеманкса.
Тейнек марса эряви обеспечендамс общественнай безопасностть РФ-нь Президентть и МР-нь Оцюнять кочкамстост. Тяса важна эсь пингстонза сявондемс перьсемс кить противоправнай тевс тернематненди, насилияти, массовай беспорядкатненди.
Аф весть ни отмечсине, што работанте сядовок эрявиксокс арси 2018 кизонь футболть коряс миронь чемпионатть карша. Тейнек сави примамс 100 тежяньда лама инжи, и Мордовиянь внутренняй тевонь оргаттне должетт улемс анокт тянди.
14 мартста мон васетькшнень нацгвардиянь войскатнень Приволжскяй федеральнай округснон мархта командующайть Александр Порядинонь мархта. И минь саме мяльс, што Мордовияса Росгвардиянь подразделениятне маластонь пингть получасазь эсь зданияснон.
Кельгома ялгат!
Мялезе азомс благодарностень валхт Мордовия Республикать эзга Росгвардиянь отделть составонцты честнай и самоотверженнай трудонкса, мужестванкса и профессионализманкса.
Нинге весть поздравляндатядязь ила мархта!
Седи ваксста арьсян теенть, сембе мала ломанентенди кеме шумбраши, благополучия, мир и сембе цебярть!
Меле республикань Оцюнясь максозень казнетнень инь цебярь сотрудникненди. Стане жа Росгвардиянь боецнень поздравляндазь Мордовия Республикать эзга Главнай федеральнай инспекторсь М.С.Сезганов, МР-нь Госсобраниять председателенц заместителец В.В.Алехин, Саранск ошень округонь оцюнять заместителец И.М.Объедкина.
Ответнай вал мархта выступандась Мордовия Республикаса Российскяй Федерациянь Национальнай гвардиянь войскатнень отделснон начальникоц В.Н.Разин.