«Мордовияса ОЭЗ-ть тиемац ули водендаф телекоммуникациянь сфераса импортть полафтоманкса оптоволокнать нолдаманцты, химическяй и промышленнай отраслятнень, водороднай энергетикать виияфнемаснонды, а стане жа сжиженнай природнай газть производстванцты. Регионти — тя важнай направленият, конатнень эзда ащи сонь социально-экономическяй касондомац-вииякшнемац, водендакшнихть од инвестицият и лезнихть панчсемс од рабочай вастт», - азозе Россиянь экономическяй развитиянь министрть заместителец Дмитрий Вахрухов.
Валонзон коряс, кочкафт ни якорнай резиденттне, конат арьсекшнихть ётафтомс эряфс ОЭЗ-ть территорияса инвестиционнай проектт 31 миллиард цалковаень питнеса и панжемс 775 рабочай васта.
Синь лувкссост - «Оптиковолоконные Системы» саранскяй заводса оптическяй волокноть производстванц омбоце комплексоц. Заводть омбоце очереденц строямац лезды тиемс производствань пяшксе цикла и тии няеви путкс телекоммуникациянь сфераса импортть полафтоманцты. Тяниень пингть уликс производствати заготовкатне пачфневихть омба масторста.
«Республикаса особай экономическяй зонань тиемась — тя регионть и целайнек странать виияфнемаса стратегическяй задачатнень ёткста фкясь, а стане жа 2022-2026 кизотненди Мордовиять социально-экономическяй вииякшнемань программанц рамкаса фкя инь важнай мероприятиясь», - мярьгсь Мордовиянь Оцюнясь Артём Здунов.
ОЭЗ-ти работама профессиональнай кадрань водендаманкса кармайхть сярьгятькшневома Мордовскяй госуниверситетонь и Мордовскяй педагогическяй университетонь, а стане жа лия профильнай вузонь и колледжень выпускникне.
Машиностроительнай отраслянь промышленнай предприятиятненди инженерно-техническяй персоналть анокламанц обеспечендасы машиностроениянь Рузаевскяй институтсь.