Сувафтфт полафткст «О республиканском бюджете Республики Мордовия на 2023 год и на плановый период 2024 и 2025 годов» Мордовия Республикань Законти. 2023 кизонди дохоттнень объёмсна и бюджетть расходнай пяльксоц касфтфт 1 миллиард 78 миллион цалковайда. Дополнительнай поступлениятне улихть нолдафт китнень петемаснонды, республикань здравоохранениянь системать работанц обеспечендаманцты, населениять транспортнай обслуживаниянцты, ломаттнень аварийнай и ташта эряма вастста ётафтомаснонды и лия тевонди.
Депутаттне кирдезь законопроектть ширенц, конань лихтезе ваномс республикань прокурорсь Сергей Лапин. Полафткснень мяльс сявозь, республиканскяй тядянь капиталонь средстватнень тяни ули кода нолдамс товаронь и услугань, конат арьсефт инвалид иттнень социальнай адаптацияснон инкса, рамамати. Тяда башка, выплатать ули кода карьхцямс Россиять территорияса ащи здравоохранениянь учреждениятнень эса шабатненди питне лангс макссеви медицинскяй услугатнень инкса, а стане жа шабатнень ваймосеманкса и шумбрашиснон кемокснеманкса пандоманкса.
Сессияса примаф «О внесении изменений в Закон Республики Мордовия «О бюджете Территориального фонда обязательного медицинского страхования Республики Мордовия на 2023 и на плановы период 2024 и 2025 годов» законць. Фондть бюджетонц доходонзон объёмсна кадови полафтксфтома и кармай 11,539 миллиард цалковай, карьхцнень — 11,572 миллиард цалковай. ОМС-нь территориальнай программать финансировандаманцты 2023 кизоня арьсекшневи нолдамс 11,2 миллиард цалковай, 2024 кизоня — 12 миллиард цалковай, 2025 кизоня — 12,7 миллиард цалковай.
Кемокстаф 2024 кизонди избирательхнень наказснон коряс предложениятнень спискасна. Эзонза сувасть кизефксне, конат сотфт автомобильнай китнень строямаснон и петемаснон, здравоохранениянь, образованиянь, культурань учреждениятнень капитальнай ремонтснон мархта.
Ванфтольхть и лия кизефкст.
Правительственнай часть рамкаса Мордовия Республикать эзга Роспотребнадзорть руководителец Татьяна Харитонова азондсь депутаттненди 2023 кизоня ведомствать работанц колга и республикаса населениять санитарно-эпидемиологическяй благополучиянц обеспечендаманц коряс примсеви мератнень квалма.