Кизоньберь компаниясь нолясь специализированнай подвижной составт и аноклакшнесь модельхть заказчикнень индивидуальнай вешфксснон коряс. Рынкать оцю оценканц полчазь компаниять разработканза — курокста гастяви гаснень пачфнеманкса вагонць-термоссь и сжиженнай природнай газть усксеманкса контейнерсь-цистернась.
Кизоть аделавомс предприятиясь арьсекшни нолдамс 10 600 лама единица. Грузовой подвижной составонь производствань объёмтне ванфтовихть меляцекс. Тядде компаниясь няевиста касфтозе литьять ноляманц — оцю вагоннай литьянь 12 вагонокомплекс и 19000 тоннада лама средняй и мелкай вагоннай литья.
Компаниясь шумордакшнесы кизоть цебярь результат мархта, и тянь эса, Максим Тевсонь валонзон коряс, ули эрь сотрудникть путксоц. «Сяс примаф решения пандомс эрь ковонь зарплатать 14 процентонц эзда сявомок 20 процентонцты молемс премия, сонь получасазь работникнень 95 процентсна — 6600 лама ломань. Налоговай отчислениятне республикать бюджетозонза 2023 кизонкса кассть колмонь-крда 2021 кизоть коряс», - китькстазе компаниять руководителец.
Артём Здунов мярьгсь, што холдингсь — республикать надёжнай партнёроц. «Тинь макссетяда рабочай вастт, обеспечендакшнетяда аф кальдяв налоговай отчисленият, и сембода главнайсь, касонттада-вииякшнетяда, касфнесасть инвестиционнай активностть. Машиностроениясь — промышленностеньконь флагманоц, а «РМ Рейл» компаниясь лезни республикати ванфнемс лидеронь позициянзон российскяй вагоностроительхнень ёткса».
Мордовия Республикань Оцюнять пресс-службац