Еткшиста, 8 апрельста, Мордовиянь Оцюнясь Владимир Волков етафтсь рабочай васедема «Норов» агрофирмать вятиенц Александр Поздняковонь мархта.Корхтамась мольфтевсь холдингть 2016 кизоня работанц, а стане жа Кочкуровскяй районца велень хозяйствань производствать виияфнеманц коряс платтнень колга.
Александр Поздняков пачфтсь республикань Оцюняти меля работань итокнень колга, отмечамок, што сивольть производствац пачфтьфоль 5300 тоннас, мезсь 1200 тоннада сяда лама тяда ингольдень кизоть коряс. 30 процентта кассь агрохолдингонь хозяйстватнень эса и серонь производствась, получафоль 30 тежянь тонна. Маластонь кизотнень арьсекшневи лихтемс пяшксе мощностьс видьмонь заводть (9000 тонна видьма кизоста), мезсь педа-пес пяшкодьсы качественнай видьмоса республикать вешфксонц. Тянкса строявихть 8 тежятть тоннат продукциянь ванфтоманкса складской помещеният, а тядде арьсеви получамс 3 тежятть тонна видьма.
Владимир Волков кизефнесь кода мольфтеви Воеводскяй Станция поселкаса лофцть переработканц коряс 10 тежжятть литра суткаста мощность мархта тяниень пингонь заводть строямац. Проектть марстонь питнец 150 миллион цалковай. Тяса аноклави продукциясь: лофца, кисломолочнай продукция, мичке, ланга, тракс вай, сыронь несколька вид, натуральнай мороженай. «Норов» агрофирмать вятиец азозе республикань Оцюняти, што тяддень сексеня заводсь кармай анок тевс нолдаманкса.
Мордовия Республикань Оцюнять Пресс-службац