Корхтафтовсь международнай сотрудничендамань сфераса марстонь работань вятемась, а стане жа регионть инвестиционнай потенциалонц инголи мольфтемац и омба масторонь партнёронь вешендемась.
Сергей Малов пачфтсь республикань руководительти сянь колга, што пандемийскяй ограничениятнень валхтомда меле Россиянь МИД-сь эреклафтозе Россиянь региоттнень экспортнай возможностьснон няфтеманкса презентациянь ётафтомань практикать: «Мордовиять производственнай, образовательнай, культурнай, туристическяй потенциалонц инголи мольфтеманкса, омба масторонь аудиториять, тяконь лувксса инвесторхнень и промышленникнень, мархтонза содафтоманкса Россиянь МИД-сь анок эсь площадканц лангса ётафтомс республикать презентациянц». Артём Здунов тердемать примазе: «Кеман, тя пяк эффективнай инструмент регионть лангс омба масторонь коллеганьконь мяльснон шарфтоманкса».
Стане жа ширетне корхтасть Мордовияса омба масторонь журналисттненди пресс-туронь ётафтомать колга. Мордовиянь Оцюнясь китькстазе, што тяфтама марстонь тевонь вятемась лезды няфтемс омба масторонь аудиторияти массовай информациянь средствань представительхнень вельде республикать одкстоптф имидженц.
Артём Здунов тердезе Сергей Маловонь и Россиянь МИД-ть представителензон ваномс Мордовиять экспозициянц «Россия» Международнай выставкаса-форумса, кона панжеви Москуса 4 ноябрьста ВДНХ-са Российскяй Федерациянь Президентть Владимир Путинонь поручениянц коряс. Лятфтасаськ, Мордовиять шиц выставкаса кармай 30 ноябрьста, учендови кели культурнай и деловой программа.
Васедемаса примась участия Россиянь МИД-ть Представительстванц Саранск ошса Отделениянц руководителец Светлана Старцева.
Мордовия Республикань Оцюнять пресс-службац