25 апрельста Мордовиянь Оцюнясь Артем Здунов поздравляндазень курок максови медицинскяй лезксонь службань покодихнень профессиональнай иласнон и юбилейнай датать мархта.
Ульсь китькстаф, што тяниень курок лезксонь максома службаса покоди 900 ломань – тя врачт, средняй медицинскяй работникт, водительхт и лия специалистт. Эрь кизоня службась примси 200 тежяньда лама тердема. Арьсеви, што курок лезкссь – тя врачебнай искусствать эхянь вярдень пяльксоц.
«90 кизоста ламось полафтсь – ломаттне, подходттне. Но прявкссь, што курок лезксонь максома службась ульсь и лядонды медицинань ингольдень отрядкс. Инь стака пинкнень пингста, конатне эвондакшнихть ломанень эряфса, минь инголькиге пшкяткшнетяма врачненди. Тинь авторитетонтте афкуксонь!» - мярьгсь регионтть руководителец.
Артём Здунов китькстазе: аф ваномок работать сембе сталмонзон лангс, тяса покодихть эсь лацонь трудовой династият. Саранскяень курок медицинскяй лезксонь максома Станцияса синь эздост мзярошка – Ивановне, Ремнёвне, Афанасьевне и Аникиттне. Синь марстонь покодемань стажсна 500 кизоть малава. Фкясь инь няевикс кепотькснень эзда –Аникиттнень семьяснон покодемань династиясна: колма поколенияста вете ломатть покодсть тяса 150 кизода лама и стаки лездыхть ломаненди сяда тов.
Курок лезксонь максома службаса покодемась пяк стака и сяви лама вий. Сянкса Мордовиянь Оцюнясь китькстазе: цебярь образованиясь и наставниконь содамашинь максомась налхки эрявикс роль тя профессиять эса. Ламоц экстреннай ситуациятне анайхть врачть и фельдшерть кядьста кели содамашит, кельме ётть и сидеста синь лангозост аш анок каршек вал. Сянкса курок лезксонь максома службаса маштыхть покодема аньцек аф куксонь эсь тевонь содай ломатть. Эрявикс ширесь и медиконь рядтнень пяшкодемасна од специалистса. Тяниень пингть оцю мяль шарфневи васенце лезксонь максомати населениять тонафтоманцты – республикась нолдась эряфс пилотнай проект тактическяй медицинать коряс.
Кенярьфти, што мекольце кизотнень ламода одкстоптф курок медицинскяй лезксонь максома службань – анцек этай кизоть сон пяшкодсь 21 автомобиль лангс, а вете кизоста республикав сась 150 лама од машина. Тага ушедовсь санитарнай авиациять покодемац.
«Монь мялезе сюконямс теенть тинь героень трудонттень инкса, эсь прянь аф ужяльдеманкса, терпениянкса, тинь кеме психологическяй кирдеманттень инкса, ломаненди лезксонттень эхянь стака пинкнень пингста. Оцю сюкпря и модать вакс прянь нолдама!» - мярьгсь Артём Здунов.
Мордовиянь Оцюнясь казсь питни наградат. Синь ётксост, лама кизонь трудонкса и оцю путфксонкса курок медицинскяй лезксонь максомаса отличиянь знакса «За самоотверженный труд» казьфт курок медицинскяй лезксонь максомань Станциянь врачне Людмила Автаева и Адиля Федина, а тяфта жа Ирина Ахлестина Рузаевскяй центральнай районнай больницяста. Почетнай звания «Заслуженный врач Республики Мордовия» максф курок медицинскяй лезксонь максомань Станциянь старшай врачти Татьяна Михайлованди, «Заслуженный работник здравоохранения Республики Мордовия» - Комсомольскяй ЦРБ-нь курок медлезксонь фельдшерти Маргарита Полушкинанди.
Церемониянь участникнень тяфта жа поздравляндазь васенце вице-премьерсь Галина Лотванова, Мордовиянь Госсобраниянь Председательть полафтыец Наталья Долматова и РМ-нь шумбрашинь ванфтомань министрсь Олег Маркин.
Мордовия Республикань Оцюнять пресс-службац