21 и 22 январьста Москуса ульсь «Единая Россия» партиять XVI –це съездоц. Сонь работасонза участия примасть 3 тежяньда лама ломань – делегатт, профильнай министерствань представительхть, Госдумань депутатт. 696 делегатть эзда кафксотне ульсть Мордовияста. Съездть работаса участия примась республикань Оцюнясь Владимир Волков, кона кочкафоль «Единая Россия» Партиять высшай советс.
Съездонь васенце шиня делегаттне работасть дискуссионнай плащадкатнень лангса, коса корхтамась мольфтевсь партиять кочкамада ингольдень программанц эряфс етафнеманц васенце итогонзон квалма, ванфтольхть властть и народнай контрольть работаснон коряс, предпринимательствать ширенц кирнеманц и бюджетнай средстватнень эффективнайста тевс нолнемаснон, наукать, образованиять, культурать виияфнемаснон коряс кизефксне.
Омбоце шиня ульсь пленарнай заседаниясь, конань итогонзон коряс примафоль несколька важнай решения, эвондасть, тяка лувксса партиять руководящай составсонза кадровай полафткст.
- Съездса максфоль оценка промышленностть, велень хозяйствать, строительствать и лия отраслятнень вииякшнемаснонды, - мярьгсь Мордовиянь Оцюнясь Владимир Волков съездти итогонь тиемста. – Азфоль, што сембе тя ширетнень эса работай «Единай Россиясь». Тяка пингть башка китькстафоль партиять оцю ответственностец странаньконь экономиканц и социальнай сферанц виияфнемаснон коряс. Етафневихть эряфс и партийнай проектт. Етксост – «Минь пирьфоньке» проектсь. Корхтамась мольфтеви куд пирьфнень, подъезттнень благоустройстваснон, ломаттнень парста эряманкса условиянь тиемать квалма. Съездса корхтафоль сянь колга, мезе тиема тя ширеса. Оцю мяль шарфтфоль велень хозяйствать виияфнеманцты, китькстафоль, што тя проектсь путневи васенце вастти, аграрийхне кармайхть получсема лезкс. Велень хозяйствась должен арамс передовой отраслякс, кона должен обеспечендакшнемс странаньконь продовольственнай безопасностенц. Съездса кепсевсть кизефксне социальнай сферать, здравоохранениять, образованиять, наукать ширеснон кирнеманц коряс.
Владимир Волков: «Мялезе азомс благодарностень валхт сембе избирателеньконди, «Единая Россия» партиянь члеттненди. Партиять Высшай советс кочкамазе, Владимир Чибиркинонь и Василий Пискаревонь Генеральнай советти кочкамасна корхтай «Единай Россиять» минь региональнай отделенияньконди довериянц квалма. Тя Мордовиять работанцты эсь лацон оценка».